പെരിയ ഇരട്ടക്കൊലക്കേസ്: സംഭവിച്ചത് എന്തെന്നറിയാൻ സിബിഐയുടെ നാടകീയ തുടക്കം സഹായിക്കുമോ ?

2019 ഫെബ്രുവരി 19നായിരുന്നു ശരത് ലാലും കൃപേഷും കൊല്ലപ്പെട്ടത്. ഇരകളുടെയോ പ്രതിസ്ഥാനത്തുള്ളവരുടെയോ രാഷ്ട്രീയമൊന്നും ഒരന്വേഷണ ഏജൻസിക്കും ബാധകമല്ലെന്നാണ് പൊതു ധാരണ. പെരിയ കേസിൽ സിപിഎം പ്രാദേശിക നേതാക്കളും അനുഭാവികളുമായ 14 പേരാണ് പ്രതികൾ. സംസ്ഥാന ക്രൈം ബ്രാഞ്ച് കേസ് അന്വേഷിച്ച് കുറ്റപത്രവും തയ്യാറാക്കിയിരുന്നു. എന്നാൽ കൊല്ലപ്പെട്ടവരുടെ രക്ഷിതാക്കൾ സിബിഐ അന്വേഷണം ആവശ്യപ്പെട്ട് ഹൈക്കോടതിയെ സമീപിച്ചു.

പെരിയ ഇരട്ടക്കൊലക്കേസ് രാഷ്ട്രീയ കോളിളക്കം സൃഷ്ടിച്ച ഒന്നായതുകൊണ്ടാണ് ശരാശരി മലയാളിക്ക് സിബിഐ വന്നാൽ എന്താകും എന്ന ആകാംഷ ഉദിച്ചത്.സിബിഐ വരുന്നു,( അന്വേഷണ സംഘം എത്തുന്നു) നാട്ടുകാരിൽ നിന്ന് തെരഞ്ഞെടുത്ത 8 പേരെ പ്രതികളെന്ന് മുദ്ര കുത്തിയ മുഖം മൂടി അണിയിക്കുന്നു. രണ്ട് പേരെ ഇരകളുടെ വേഷം കെട്ടിക്കുന്നു.മറ്റ് ചിലരെ രക്ഷാപ്രവർത്തകരുടെ വേഷവും ധരിപ്പിക്കുന്നു.

ഒറ്റവാക്കിൽ പറഞ്ഞാൽ കുറ്റകൃത്യം പുനരാവിഷ്കരിക്കുന്നതിലൂടെ പ്രത്യേകിച്ച് തെളിവുകളൊന്നും അന്വേഷണ സംഘത്തിന് ലഭിക്കില്ല. സാങ്കേതിക -ശാസ്ത്രീയ അന്വേഷണ രീതി ഇത്രയും പുരോഗമിച്ച കാലത്ത് ഇത്തരം അന്വേഷണ രീതിയൊക്കെ കാലഹരണപ്പെട്ടതാണെന്ന് അന്വേഷണ ഉദ്യോഗസ്ഥർക്കും അറിയാവുന്നതാണ്. സിബിഐ ഡയറിക്കുറിപ്പ് സിനിമയിലെ 'ഡമ്മി' പരീക്ഷണമൊക്കെ സിബിഐ പോലുള്ള ഏജൻസികൾ ഉപേക്ഷിച്ചിട്ട് കൊല്ലം ഏറെയായി.

സംസ്ഥാന സർക്കാരിന്റെ എതിർപ്പുകളെ കോടതി വിധികൊണ്ട് മറികടന്ന് പെരിയയിൽ സിബിഐ എത്തിയപ്പോൾ സന്തോഷിച്ച ഇരകളുടെ രക്ഷിതാക്കൾക്കെങ്കിലും സിബിഐ എന്തൊക്കയോ ചെയ്തു എന്ന് തോന്നണം. പിന്നെ തിരുവനന്തപുരത്ത് നിന്ന് കാസർഗോഡ് പെരിയ വരെ എത്തിയിട്ട് സിബിഐ ഒന്നും ചെയ്തില്ലെന്ന് ആരും വിമർശിക്കാനും പാടില്ല, കൂടാതെ സോഷ്യൽ മീഡിയയിലും വിഷ്വൽ മീഡിയയിലും ഒരു സിനിമാറ്റിക് അന്വേഷണത്തിന്റെ ത്രില്ല് കാഴ്ചക്കാരന് ലഭിക്കുകയും വേണം. ഇതൊക്കെ പെരിയയിൽ നടന്ന പുനരാവിഷ്കാരത്തിലൂടെ സാധ്യമായി എന്നതിൽ തർക്കമില്ല. ഇനിയെന്തെങ്കിലും തുമ്പ് ഇതിൽ നിന്ന് അന്വേഷണ സംഘത്തിന് ലഭിച്ചോ എന്ന് ആകാംഷയോടെ കാത്തിരുന്ന ശരാശരി മലയാളി സിബിഐയുടെ അന്തിമ റിപ്പോർട്ട് വരും വരെ വീണ്ടും കാത്തിരിക്കുക തന്നെ വേണം.