'പൂത്തുമ്പീ- കുര്‍ള മമ്മീ' കാലം വീണ്ടും വരുമോ? ടിക് ടോക്ക് ബ്ലോക്കിൽ കേന്ദ്രസര്‍ക്കാര്‍ എന്താ പറയുന്നത്?

ഇന്ത്യയില്‍ ഒരു കാലത്ത് ഏറെ സജീവമായിരുന്നു ചൈനീസ് സോഷ്യല്‍ മീഡിയ ആപ്പായ ടിക് ടോക്ക്. 'പൂത്തുമ്പി കുര്‍ള മമ്മീ പാട്ടും' അത് ഉള്‍പ്പെടുന്ന ചെറു ടിക് ടോക്ക് വീഡിയോകളും രാജ്യത്ത് വമ്പന്‍ ഹിറ്റായിരുന്നു. ചില സുരക്ഷാ കാരണങ്ങള്‍ ചൂണ്ടിക്കാട്ടി 2020 ജൂണ്‍ മുതല്‍ കേന്ദ്രസര്‍ക്കാര്‍ ഇന്ത്യയില്‍ ഈ പ്ലാറ്റ്‌ഫോം നിരോധിച്ചു. സോഷ്യൽ മീഡിയയിൽ ചെറുവീഡിയോകൾ നിർമിച്ചിരുന്ന നിരവധി ആരാധകർ ആപ്പിന്റെ നിരോധനത്തിൽ നിരാശയിലായിരുന്നു. എന്നാല്‍ ടിക് ടോക്കിന്റെ വെബ്‌സൈറ്റ് ലഭ്യമാകുന്നുണ്ടെന്ന് ചില അഭ്യൂഹങ്ങള്‍ കഴിഞ്ഞ ദിവസം റിപ്പോര്‍ട്ട് ചെയ്തിരുന്നു. ടിക് ടോക്കിന്റെ വെബ്‌സൈറ്റ് ലഭ്യമായി തുടങ്ങിയെന്ന് ചില ഉപയോക്താക്കള്‍ റിപ്പോര്‍ട്ട് ചെയ്തതിനെ തുടര്‍ന്ന് അത് തിരിച്ചുവരുമെന്ന തരത്തിലുള്ള അഭ്യൂഹങ്ങളാണ് പരന്നത്. ഗൂഗിള്‍ പ്ലേ സ്റ്റോറിലും ആപ്പിള്‍ ആപ്പ് സ്റ്റോറിലും ആപ്പ് ലഭ്യമല്ലെങ്കിലും ടിക്ക് ടോക്ക് വെബ്‌സൈറ്റ് ലഭ്യമാണെന്നുള്ള വാര്‍ത്ത പരന്നത് ആരാധകരില്‍ ആവേശം വര്‍ധിപ്പിച്ചു. എന്നാല്‍ ഇന്ത്യയിലെ എല്ലാ ഐഎസ്പികളിലും വെബ്‌സൈറ്റ് ബ്ലോക്ക് ചെയ്തിരിക്കുകയാണെന്ന് ടെലികമ്മ്യൂണിക്കേഷന്‍ വകുപ്പ് സ്ഥിരീകരിച്ചു. ടിക് ടോക്കിന്റെ മാതൃകമ്പനിയായ ബൈറ്റ്ഡാന്‍സ് ആപ്പിന്റെ പ്രവര്‍ത്തനം ഇന്ത്യയില്‍ പുനഃരാരംഭിക്കുന്നതിനെ കുറിച്ച് ഔദ്യോഗിക പ്രസ്താവനയൊന്നും പുറപ്പെടുവിച്ചിട്ടില്ല.