Ganesh Chathurthi 2025| ഗണപതിയുടെ ജന്മദിനം; വ്രതാനുഷ്ഠാനം എങ്ങനെ?

വിനായക ചതുർത്ഥി ദിനത്തില്‍ വ്രതം അനുഷ്ഠിച്ചാൽ അടുത്ത വിനായക ചതുർത്ഥി വരെയുള്ള ഒരു വര്‍ഷക്കാലം സർവ വിഘ്‌നങ്ങളും നീങ്ങി ഉദ്ദിഷ്ട കാര്യലബ്‌ധിയുണ്ടാവുമെന്നാണ് വിശ്വാസം. ചതുർത്ഥിയുടെ തലേന്ന് മുതൽ ഒരിക്കലോടെ വ്രതം ആരംഭിക്കണം. മത്സ്യമാംസാദികൾ ഉപേക്ഷിണം. എണ്ണതേച്ചു കുളി, പകലുറക്കം എന്നിവ പാടില്ല. ചതുർത്ഥി ദിനത്തിൽ സൂര്യോദയത്തിനു മുന്നേ കുളിച്ചു ശരീരശുദ്ധി വരുത്തി നിലവിളക്കു തെളിയിച്ചു ഗണപതി ഗായത്രികൾ ഭക്തിയോടെ ജപിക്കണം.

വിനായക ചതുര്‍ത്ഥി ദിവസം ചന്ദ്ര ദര്‍ശനം നന്നല്ല‌. അതിനു പിന്നില്‍ ഒരു ഐതിഹ്യമുണ്ട്. ഒരിക്കല്‍ പിറന്നാള്‍ സദ്യ കഴിച്ച ശേഷം എഴുന്നേല്‍ക്കുവാന്‍ ശ്രമിച്ചപ്പോള്‍ ഗണപതി ഭഗവാന്‍ അടിതെറ്റിവീണു. ഇതു കണ്ട ചന്ദ്രന്‍ അദ്ദേഹത്തെ പരിഹസിച്ച് ചിരിച്ചു. അതില്‍ കോപിഷ്ഠനായ ഗണേശന്‍ ചന്ദ്രനെ ശപിച്ചു. 'ഇന്നേ ദിവസം നിന്നെ ദര്‍ശിക്കുന്നവരെല്ലാം ദുഷ്‌പേര് കേള്‍ക്കുവാന്‍ ഇടയാകട്ടെ' എന്നായിരുന്നു ശാപം. അതിനാല്‍ വിനായക ചതുര്‍ത്ഥി ദിവസം ചന്ദ്രനെ നോക്കിയാല്‍ മാനഹാനി ഉണ്ടാകുമെന്നാണ് വിശ്വാസം.

ക്ഷേത്രങ്ങളില്‍ വിനായക ചതുര്‍ത്ഥി ദിവസം അഷ്ടദ്രവ്യ മഹാഗണപതി ഹോമവും മഹാഗണപതി ഹോമവും നടത്താറുണ്ട്. മറ്റു സംസ്ഥാനങ്ങളില്‍ വിനായക ചതുര്‍ത്ഥി പത്ത് ദിവസമാണ് ആഘോഷം. ഇത് ഗണേശോത്സവം എന്ന പേരിലാണ് അറിയപ്പെടുന്നത്. ഗണപതി ഭഗവാന്റെ വലിയ പ്രതിമകള്‍ പ്രധാനപ്പെട്ട സ്ഥലങ്ങളില്‍ സ്ഥാപിച്ച ശേഷം പത്ത് ദിവസം രാവിലേയും വൈകിട്ടും പൂജകളും ഭജനകളും നടത്തും. മധുര പലഹാര വിതരണവും ഉണ്ടാകും. പതിനൊന്നാം ദിവസം വാദ്യ മേളങ്ങളുടെ അകമ്പടിയോടെ ഈ പ്രതിമകള്‍ ഘോഷയാത്രയായി കടലിലേക്ക് കൊണ്ടു പോയി നിമജ്ജനം ചെയ്യും. ഗണേശോല്‍സവ സമിതികളുടെ നേതൃത്വത്തിലാണ് ആഘോഷങ്ങള്‍.