പ്ലേ സ്റ്റേഷൻ നിയന്ത്രിച്ച ബീജസങ്കലനത്തിലൂടെയുള്ള ആദ്യത്തെ കുട്ടികൾ പിറന്നു; ബീജം കുത്തിവെച്ചത് റോബോട്ട്

ബീജസങ്കലനത്തിനായി ഉപയോ​ഗപ്പെടുത്താവുന്ന ലോകത്തിലെ ആദ്യത്തെ റോബോട്ടിനെ വികസിപ്പിച്ചതിൽ പങ്കാളിയായ പ്രധാന എഞ്ചിനീയർമാരിൽ ഒരാൾക്ക് ഫെർട്ടിലിറ്റി മെഡിസിൻ മേഖലയിൽ വളരെ കുറഞ്ഞ പരിചയം മാത്രമേ ഉണ്ടായിരുന്നുള്ളൂ എന്ന് റിപ്പോർട്ടുകൾ സൂചിപ്പിക്കുന്നു. എന്നാൽ, സോണി പ്ലേ സ്റ്റേഷൻ 5 കൺട്രോളർ ഉപയോഗിച്ച് ഈ പ്രവർത്തനങ്ങൾ നിയന്ത്രിക്കാൻ അവർക്ക് കഴിഞ്ഞു. ബീജം അടങ്ങിയ ഐവിഎഫ് സൂചി റോബോട്ടിനെ ഉപയോഗിച്ച് അണ്ഡത്തില്‍ കുത്തിവെയ്ക്കുകയായിരുന്നു. ഈ സാങ്കേതിക വിദ്യയിലൂടെ ബീജകോശങ്ങൾ പല തവണ അണ്ഡത്തിലേക്ക് നിക്ഷേപിച്ചു.

ആരോഗ്യകരമായ ഭ്രൂണങ്ങൾ ഉണ്ടാകുന്ന തരത്തിലുള്ള ​നടപടിക്രമങ്ങളാണ് ഇവിടെ സ്വീകരിച്ചതെന്ന് ​ഗവേഷകർ പറയുന്നു. രണ്ടു പെൺകുട്ടികളാണ് ഈ പുത്തൻ സാങ്കേതിക വിദ്യയിലൂടെ പിറന്നിരിക്കുന്നത്. ഓട്ടോമേറ്റഡ് സാങ്കേതികവിദ്യയുടെ സഹായത്തോടെ നടത്തിയ ബീജങ്കലനം വഴി ജനിച്ച ആദ്യത്തെ കുട്ടികളാണ് ഇവരെന്നും ഗവേഷകർ അവകാശപ്പെട്ടു.

ഇൻ വിട്രോ ഫെർട്ടിലൈസേഷൻ അല്ലെങ്കിൽ ഐവിഎഫ് ഓട്ടോമേറ്റ് ചെയ്യുന്നതിനുള്ള ആദ്യത്തെ ചുവടുവെയ്പാണ് തങ്ങളുടെ ഈ കണ്ടുപിടിത്തമെന്നും ഇതിനായി സ്വീകരിക്കുന്ന നടപടിക്രമങ്ങൾ നിലവിലുള്ള ഐവിഎഫിനേക്കാൾ വളരെ ചെലവു കുറഞ്ഞതാണെന്നും ഓവർച്ച്യൂർ ലൈഫ് പറഞ്ഞു. ​ഗവേഷണം നടത്തുന്നതിനായി ഖോസ്‌ല വെഞ്ചേഴ്‌സ്, യൂട്യൂബിന്റെ മുൻ സിഇഒ സൂസൻ വോജിക്കി തുടങ്ങിയ നിക്ഷേപകരിൽ നിന്ന് 37 മില്യൺ ഡോളർ ധനഹസായം കമ്പനിക്ക് ലഭിച്ചിരുന്നു.

ഇപ്പോൾ ഇൻ വിട്രോ ഫെർട്ടിലൈസേഷൻ ലബോറട്ടറികൾ സാധാരണയായി കൈകാര്യം ചെയ്യുന്നത് ഈ മേഖലയിൽ ഉയർന്ന വൈദഗ്ധ്യമുള്ള എംബ്രിയോളജിസ്റ്റുകളാണ്.

“ഇത് വിപ്ലവകരമായ ഒരു കണ്ടുപിടിത്തമാണ്. എന്നാൽ, ഇതൊരു തുടക്കം മാത്രമാണ്,” 1990-കളിൽ ഇൻട്രാസൈറ്റോപ്ലാസ്മിക് ബീജ കുത്തിവെയ്പ് (ഐസിഎസ്ഐ) വികസിപ്പിച്ച ജിയാൻപിറോ പലെർമോ പറഞ്ഞു. റോബോട്ടിന്റെ സഹായം കൂടാതെ, ബീജകോശങ്ങൾ സ്വമേധയാ ലോഡ് ചെയ്യാനുള്ള വഴി ഓവർച്യൂറിലെ എഞ്ചിനീയർമാർ കണ്ടുപിടിക്കേണ്ടതുണ്ടെന്നും അദ്ദേഹം കൂട്ടിച്ചേർത്തു.