International Coffee Day 2021: ഉന്മേഷത്തിന് ഒരു കപ്പ് കാപ്പി കുടിച്ചാലോ? ഇന്ന് അന്താരാഷ്ട്ര കാപ്പി ദിനം

എല്ലാ വർഷവും, കാപ്പിയുടെ ഉപയോഗം ആഘോഷിക്കുന്നതിനും പ്രോത്സാഹിപ്പിക്കുന്നതിനുമായി ഒക്ടോബർ 1 അന്താരാഷ്ട്ര കോഫി ദിനമായാണ് ആചരിക്കുന്നത്. എന്നാൽ കാപ്പി ആരോഗ്യത്തെ ദോഷകരമായി ബാധിക്കുമെന്ന് വിശ്വസിക്കുന്ന നിരവധി ആളുകളുമുണ്ട്.

എല്ലാ ദിവസവും രാവിലെ നിങ്ങൾക്ക് ഒരു കപ്പ് ചൂട് കാപ്പി ലഭിക്കുന്നതിന് പിന്നിൽ നിരവധിയാളുകളുടെ പരിശ്രമങ്ങളുണ്ട്. കോഫി ഫാമുകളിലെ നിരവധി തൊഴിലാളികളാണ് ഇതിനായി അശ്രാന്തമായി പ്രവർത്തിക്കുന്നത്. അന്താരാഷ്ട്ര കാപ്പി ദിനത്തിൽ, ഈ തൊഴിലാളികളുടെയും കാപ്പി വ്യവസായവുമായി ബന്ധപ്പെട്ട ആളുകളുടെയും കഠിനാധ്വാനവും പരിശ്രമവുമാണ് അംഗീകരിക്കപ്പെടുന്നത്.

1997ൽ, ICO ആദ്യമായി ചൈനയിൽ അന്താരാഷ്ട്ര കോഫി ദിനം ആഘോഷിച്ചിരുന്നു. പിന്നീട് 2009 ൽ തായ്‌വാനിൽ ഈ ദിവസം ആഘോഷിച്ചു. 2005 നവംബർ 17 നാണ് നേപ്പാൾ ആദ്യത്തെ അന്താരാഷ്ട്ര കോഫി ദിനം ആചരിച്ചത്.

കാപ്പിച്ചിനോ, ഫ്രാപ്പുച്ചിനോ മുതൽ ഡബിൾ-ഷോട്ട് എസ്പ്രെസോ വരെ കോഫി പ്രേമികൾക്ക് പ്രിയപ്പെട്ട വൈവിധ്യമാർന്ന കാപ്പി വിഭവങ്ങൾ നിരവധിയാണ്. അതിനാൽ, കാപ്പിയെക്കുറിച്ച് കൂടുതൽ അറിവ് നേടുകയും അവയിൽ നിന്ന് നിർമ്മിച്ച വിവിധതരം കാപ്പികളും വിഭവങ്ങളും പരീക്ഷിക്കുകയും ചെയ്യുക എന്നതാണ് ഈ ദിവസം ആഘോഷമാക്കി മാറ്റാനുള്ള ഏറ്റവും നല്ല മാർഗം. കരൾ സംബന്ധമായ രോഗങ്ങളെ അകറ്റി നിർത്തുന്നതിന് ദിവസവും കാപ്പി കുടിക്കുന്നത് നല്ലതാണെന്ന് അടുത്തിടെ ചില പഠന റിപ്പോർട്ടുകൾ പുറത്തു വന്നിരുന്നു. സതാംപ്റ്റൻ സർവകലാശാലയിലെ ഡോ: ഒലിവർ കെന്നഡി അടുത്തിടെ നടത്തിയ ഗവേഷണത്തിലാണ് കാപ്പി ദിവസവും കുടിക്കുന്ന ആളുകൾക്ക് കാപ്പി കുടിക്കാത്ത ആളുകളേക്കൾ കരൾ രോഗം വരാനുള്ള സാധ്യത 21 ശതമാനം കുറവാണെന്ന് കണ്ടെത്തിയത്.