ധനു തിരുവാതിര മുതൽ മഹാശിവരാത്രി വരെ; ധനുവച്ചപുരത്തെ പുരാതനമായ തൃപ്പലവൂർ ക്ഷേത്രത്തിൻ്റെ ഐതിഹ്യം

തിരുവനന്തപുരം ജില്ലയിലെ ധനുവച്ചപുരത്തിനടുത്ത് സ്ഥിതി ചെയ്യുന്ന പുരാതനമായ തൃപ്പലവൂർ ശ്രീ മഹാദേവർ ക്ഷേത്രം ഭക്തജനങ്ങൾക്ക് പുണ്യപാവനമായ ഒരു ആരാധനാകേന്ദ്രമാണ്. തിരുവിതാംകൂർ ദേവസ്വം ബോർഡിൻ്റെ നെയ്യാറ്റിൻകര ഗ്രൂപ്പിലെ ചെഴുങ്ങാനൂർ സബ് ഗ്രൂപ്പിന് കീഴിലാണ് ഈ മഹാദേവ ക്ഷേത്രം വരുന്നത്. ക്ഷേത്രത്തിലെ പ്രധാന ആഘോഷങ്ങളായ ധനു തിരുവാതിര ആറാട്ട് മഹോത്സവവും കുംഭമാസത്തിലെ മഹാശിവരാത്രിയും അതീവ ഭക്തിനിർഭരമായാണ് ആഘോഷിക്കപ്പെടുന്നത്. ധനുമാസത്തിൽ എട്ടു ദിവസങ്ങളിലായി നടക്കുന്ന ആറാട്ട് മഹോത്സവം ക്ഷേത്ര തന്ത്രി നെടുവിളാകത്ത് മഠത്തിൽ ഡോ. ശ്രീധരരു വാസുദേവൻ്റെ മുഖ്യകാർമ്മികത്വത്തിൽ കൊടിയേറി എട്ടാം നാൾ തിരുആറാട്ടോടുകൂടി സമാപിക്കുന്നു. കുംഭമാസത്തിലെ ശിവരാത്രി മഹോത്സവം മൂന്ന് ദിവസങ്ങളിലായാണ് ഇവിടെ നടക്കുന്നത്. മഹാരുദ്രാഭിഷേകം, ലക്ഷാർച്ചന, പുഷ്പാഭിഷേകം തുടങ്ങിയ വിശേഷാൽ പൂജകളും നടക്കുന്നു. ശിവരാത്രി ദിനത്തിൽ രാത്രി എട്ടര മുതൽ പുലർച്ചെ ആറര വരെയുള്ള അഞ്ച് യാമങ്ങളിലായി നടക്കുന്ന യാമപൂജകൾ ക്ഷേത്രത്തിലെ പ്രധാന ആകർഷണമാണ്.