Business | പുതിയ ബിസിനസുകൾ ആരംഭിക്കാൻ അനുയോജ്യമായ മികച്ച അഞ്ച് സമ്പദ്‌വ്യവസ്ഥകളിൽ ഇന്ത്യയും: ഗ്ലോബൽ സർവേഫലം

സംരംഭക പ്രവർത്തനം, സംരംഭത്തോടുള്ള മനോഭാവം, പ്രാദേശിക സംരംഭക ആവാസവ്യവസ്ഥയെക്കുറിച്ചുള്ള കാഴ്ചപ്പാട് എന്നിവയെക്കുറിച്ചുള്ള ചോദ്യങ്ങൾക്ക് ഉത്തരം നൽകിയ ഇന്ത്യക്കാരിൽ 82 ശതമാനം പേരും ഇന്ത്യയിൽ ഒരു ബിസിനസ്സ് ആരംഭിക്കുന്നത് എളുപ്പമാണെന്ന് വ്യക്തമാക്കി. ഇതോടെ ഇന്ത്യ ആഗോളതലത്തിൽ നാലാം സ്ഥാനത്തെത്തി.

കൂടാതെ, അടുത്ത മൂന്ന് വർഷത്തിനുള്ളിൽ ഒരു പുതിയ ബിസിനസ്സ് ആരംഭിക്കാൻ പദ്ധതിയിടാത്തതിന്റെ കാരണമായി 54 ശതമാനം പേരും ചൂണ്ടിക്കാണിച്ച കാരണം പരാജയ ഭയമാണ്. ഈ പട്ടികയിൽ ഇന്ത്യ 47 രാജ്യങ്ങളിൽ രണ്ടാം സ്ഥാനത്തെത്തി. സർക്കാർ പിന്തുണയുടെ കാര്യത്തിലും ഇന്ത്യയ്ക്ക് രണ്ടാം സ്ഥാനമാണ്. 80 ശതമാനത്തിലധികം ഇന്ത്യൻ സംരംഭകരും കഴിഞ്ഞ വർഷത്തെ അപേക്ഷിച്ച് വളരെ കുറഞ്ഞ വളർച്ചാ പ്രതീക്ഷകളാണ് റിപ്പോർട്ട് ചെയ്തത്.

"ഇന്ത്യയിൽ പ്രതികരിച്ചവരിൽ 80 ശതമാനത്തിലധികം പേരും രാജ്യത്ത് ഒരു ബിസിനസ്സ് ആരംഭിക്കുന്നത് എളുപ്പമാണെന്ന് വ്യക്തമാക്കിയിട്ടുണ്ട്. ഇതോടെ ആഗോളതലത്തിൽ ബിസിനസ് ആരംഭിക്കാൻ എളുപ്പമുള്ള മികച്ച അഞ്ച് സമ്പദ്‌വ്യവസ്ഥകളിൽ ഇന്ത്യയും ഉൾപ്പെട്ടു. 'സ്റ്റാർട്ടപ്പ് ഇന്ത്യ', മെയ്ക്ക് ഇൻ ഇന്ത്യ' തുടങ്ങിയ സർക്കാർ സംരംഭങ്ങൾക്ക് നന്ദി, ഇത് മെച്ചപ്പെട്ട ഒരു സംരംഭക ആവാസവ്യവസ്ഥ സൃഷ്ടിക്കാൻ രാജ്യത്തെ സഹായിച്ചിട്ടുണ്ട്" ഗ്ലാസ്‌ഗോയിലെ സ്ട്രാത്ത്ക്ലൈഡ് സർവകലാശാലയിലെ ഹണ്ടർ സെന്റർ ഫോർ എന്റർപ്രണർഷിപ്പിലെ സീനിയർ ലക്ചററും ജെം റിപ്പോർട്ടിന്റെ എട്ട് രചയിതാക്കളിൽ ഒരാളുമായ ഡോ. ശ്രീവാസ് സഹസ്രനാമം പറഞ്ഞു.

എന്നാൽ, പൊതുജനങ്ങൾക്കിടയിലെ വളർച്ചാ പ്രതീക്ഷകൾ ഇപ്പോഴും വളരെ കുറവാണ്. അതിനാൽ, സാധാരണ ജനങ്ങളിൽ പരാജയപ്പെടുമെന്ന ഭയം കുറയ്ക്കുന്നതിന് സാംസ്കാരിക മാറ്റം ആവശ്യമാണെന്നും പുതിയ സംരംഭങ്ങൾക്ക് പിന്തുണ നൽകണമെന്നും അദ്ദേഹം പറഞ്ഞു.

ഉപഭോക്തൃ സേവനങ്ങളെ അപേക്ഷിച്ച് വ്യത്യസ്തവും വിജ്ഞാനാധിഷ്ഠിതവുമായ ഉയർന്ന മൂല്യമുള്ള ബിസിനസ്സ് സേവനങ്ങളിൽ പുതിയ സ്റ്റാർട്ടപ്പുകളെ പ്രോത്സാഹിപ്പിക്കുന്നത് ഇന്ത്യയെപ്പോലുള്ള വികസ്വര സമ്പദ്‌വ്യവസ്ഥകളുടെ വികസന പാത മെച്ചപ്പെടുത്തുകയും 5 ട്രില്യൺ ഡോളർ സമ്പദ്‌വ്യവസ്ഥ എന്ന ലക്ഷ്യത്തിലേയ്ക്ക് എത്താൻ വഴിയൊരുക്കുകയും ചെയ്യുമെന്നും അദ്ദേഹം കൂട്ടിച്ചേർത്തു.

ആഗോളതലത്തിൽ, ഈ 47 സമ്പദ്‌വ്യവസ്ഥകളിൽ 15 എണ്ണത്തിലും മഹാമാരി പുതിയ ബിസിനസ്സ് അവസരങ്ങളിലേക്ക് നയിച്ചതായി പകുതിയിലധികം സംരംഭകരും സമ്മതിക്കുന്നതായും ജെം റിപ്പോർട്ട് വ്യക്തമാക്കുന്നു. വ്യക്തിഗത സംരംഭകരിൽ നിന്ന് നേരിട്ട് സംരംഭകത്വത്തെക്കുറിച്ചുള്ള ഡാറ്റ ശേഖരിക്കുന്ന ഏക ആഗോള ഗവേഷണ ഉറവിടമാണ് ജെം.