Kerala Gold Rate| സ്വർണവില പിന്നോട്ടില്ല; ഇന്ന് ഉച്ചയ്ക്ക് ശേഷം വില കൂടി

ഗ്രാമിന് 235 രൂപയുടെ വർദ്ധനവാണ് രേഖപ്പെടുത്തിയത്. ഇതോടെ ഒരു ഗ്രാം സ്വർണ്ണത്തിന്റെ വില 13,100 രൂപയിലെത്തി.

മാസങ്ങൾക്ക് ശേഷം ഇന്നലെ സ്വർണ്ണവില ഒരു ലക്ഷത്തിന് താഴേക്ക് പോയിരുന്നു. എന്നാൽ വൈകിട്ടോടെ വില തിരിച്ചു കയറി ഒരു ലക്ഷത്തിന് മുകളിൽ എത്തുകയും രാത്രിയോടെ 1,05,000 രൂപ കടക്കുകയും ചെയ്തു. ഇന്നലെ മാത്രം രാവിലെയും ഉച്ചയ്ക്കുമായി ഏഴായിരത്തിലധികം രൂപയുടെ ഇടിവ് രേഖപ്പെടുത്തിയ ശേഷമാണ് സ്വർണ്ണം വൻ തിരിച്ചുവരവ് നടത്തിയത്. ഇതിന് പിന്നാലെയാണ് ഇന്ന് രാവിലെ വില കുറയുകയും ഉച്ചയോടെ വീണ്ടും വർദ്ധിക്കുകയും ചെയ്യുന്ന സാഹചര്യം വിപണിയിലുണ്ടായത്.

യുദ്ധം അവസാനിപ്പിക്കുന്നതിന് ഇറാനുമായി ചര്‍ച്ച നടത്തുമെന്ന അമേരിക്കന്‍ പ്രസിഡന്റ് ഡോണള്‍ഡ് ട്രംപിന്റെ വാക്കുകളെ തുടര്‍ന്ന് എണ്ണവില 15 ശതമാനം ഇടിഞ്ഞതിന് പിന്നാലെയാണ് സ്വര്‍ണവില തിരിച്ചുകയറിയത്. എന്നാൽ, ഇറാൻ ട്രംപിന്റെ വാക്കുകളെ പൂർണമായും തള്ളി. അമേരിക്കയുമായി യാതൊരുവിധ ചർച്ചയും ഇതുവരെ നടന്നില്ലെന്നും യുദ്ധവുമായി മുന്നോട്ട് പോകാനാണ് തീരുമാനമെന്നും ഇറാൻ അറിയിച്ചിരുന്നു.