Paytmന് ഇടപാടുകൾ നിർത്താൻ മാർച്ച് 15വരെ സമയം; റിസർവ് ബാങ്കിന്റെ പുതിയ ഉത്തരവ്

മുംബൈ: ഇടപാടുകൾ നിർത്താൻ പേടിഎം പേയ്‌മെന്റ് ബാങ്കിന് മാർച്ച് 15 വരെ റിസർവ് ബാങ്ക് സമയം നീട്ടി നൽകി. ഫെബ്രുവരി 29 വരെയായിരുന്നു നേരത്തേ അനുവദിച്ചിരുന്ന സമയം. 15 ദിവസം കൂടിയാണ് ആർബിഐ സമയം നീട്ടി അനുവദിച്ചിരിക്കുന്നത്. ടോപ്പ് അപ്പ്, ഫണ്ട് കൈമാറ്റം എന്നിവക്കാണ് സമയം നീട്ടി നൽകിയത്. എന്നാൽ പേടിഎം പേയ്മെന്റ് ബാങ്കിന്റെ മറ്റ് സേവനങ്ങൾക്ക് അനുവദിച്ചിരിക്കുന്ന സമയപരിധി നേരത്തെ പറഞ്ഞതുപോലെ 29ന് തന്നെ അവസാനിക്കുമെന്നും ആർബിഐ വ്യക്തമാക്കി. വ്യാപാരികൾ ഉൾപ്പെടെയുള്ളവരുടെ പൊതു താൽപര്യം പരിഗണിച്ചാണ് തീരുമാനം. ബദൽ ക്രമീകരണങ്ങൾ ചെയ്യാൻ കുറച്ചു സമയം കൂടി ആവശ്യമായി വന്നേക്കും. ഇതു കണക്കിലെടുത്താണ് തീരുമാനമെന്ന് ആർബിഐ ഉത്തരവിൽ വ്യക്തമാക്കി.