അരട്ടൈ ആപ്പ്: മൂന്ന് ദിവസത്തിനുള്ളില്‍ സൈന്‍ അപ്പ് നൂറിരട്ടി; പുതിയ ഉപയോക്താക്കളുടെ എണ്ണം പ്രതിദിനം 3.5 ലക്ഷമായി

സോഷ്യല്‍ മീഡിയയില്‍ തരംഗമായി മാറുകയാണ് ഇന്ത്യ തദ്ദേശീയമായി വികസിപ്പിച്ചെടുത്ത അരട്ടൈ ആപ്പ്. ഈ പുതിയ മെസേജിംഗ് ആപ്പ് സോഹോ നിര്‍മിച്ചതാണ്. അടുത്തിടെ ഈ ആപ്പിനുള്ള ജനപ്രീതി കുതിച്ചുയർന്നിരുന്നു. മൂന്ന് ദിവസത്തിനുള്ളില്‍ ആപ്പിലെ സൈന്‍ അപ്പുകള്‍ വന്‍ കുതിച്ചുചാട്ടമുണ്ടായതായി റിപ്പോര്‍ട്ടുകള്‍ വ്യക്തമാക്കുന്നു. പ്രതിദിന സൈന്‍-അപ്പുകള്‍ 3000ല്‍ നിന്ന് 3.5 ലക്ഷമായി വര്‍ധിച്ചുവെന്ന് ഇന്ത്യ ടുഡെയുടെ റിപ്പോര്‍ട്ട് വ്യക്തമാക്കുന്നു. കേന്ദ്രസര്‍ക്കാര്‍ നല്‍കുന്ന പ്രോത്സാഹനം, സോഷ്യല്‍ മീഡിയയിലെ ആഹ്വാനം, സ്വകാര്യതയ്ക്കുള്ള സ്ഥാനം, ആഗോള എതിരാളികളുമായി താരതമ്യപ്പെടുത്തുമ്പോള്‍ സ്‌പൈവെയര്‍ ഭീഷണിയില്‍ നിന്നു മോചനം എന്നിവയെല്ലാം അരട്ടൈ ആപ്പ് പ്രിയപ്പെട്ടതാക്കുന്നു. മെറ്റയുടെ ജനപ്രിയ മെസേജിംഗ് ആപ്പായ വാട്ട്‌സ്ആപ്പിനെ ഇത് മറികടക്കാന്‍ സാധ്യതയുണ്ടെന്ന് റിപ്പോര്‍ട്ടുകള്‍ പറയുന്നു.