ക്ലബ്ബ്ഹൗസിന് പിന്നാലെ ഓ‍ഡിയോ റൂം സേവനവുമായി ഫേസ്ബുക്ക്; പരീക്ഷണത്തിന് നേതൃത്വം നൽകി സ‍ക്ക‍‍ർബ‍ർ​ഗ്

കഴിഞ്ഞ മാസം മുതൽ തായ്‌വാനിൽ പ്രമുഖ വ്യക്തികളിലും സൃഷ്ടാക്കൾക്കിടയിലും ഫേസ്ബുക്ക് ലൈവ് ഓഡിയോ റൂമുകൾ പരീക്ഷിക്കുന്നുണ്ടെന്ന് ബ്ലൂംബർഗ് റിപ്പോർട്ട് വ്യക്തമാക്കുന്നു. ചൊവ്വാഴ്ച, സുക്കർബർഗ് മൂന്ന് ഫേസ്ബുക്ക് ഗെയിമിംഗ് സൃഷ്ടാക്കളായ സ്റ്റോൺ‌മൗണ്ടെയ്ൻ 64, ക്വീൻ എലിമിനേറ്റർ, ദി ഫിയേഴ്സ്ഡിവക്വീൻ എന്നിവരുമായി സംസാരിച്ചു. തത്സമയ ഓഡിയോ സെഷനിൽ പുതിയ ഗെയിമിംഗ് സവിശേഷതകളെക്കുറിച്ചുള്ള കാര്യങ്ങളാണ് സംസാരിച്ചതെന്ന് ടെക്ക് ക്രഞ്ച് റിപ്പോർട്ട് ചെയ്തു. എതിരാളിയായ ക്ലബ്‌ഹൗസിന് സമാനമായ രീതിയിലാണ് ഫേസ്ബുക്കിന്റെ ലൈവ് ഓഡിയോ റൂമുകൾ എന്നും റിപ്പോ‍‍ർട്ടുകളുണ്ട്. ഉപഭോക്താക്കൾക്കായുള്ള ഇന്റർ‌ഫേസിൽ‌ സ്പീക്കറും ലഭ്യമാണ്.

തത്സമയ ഓഡിയോ റൂമുകളും സൗണ്ട്ബൈറ്റുകളും ഉൾപ്പെടെ നിരവധി ശബ്ദ കേന്ദ്രീകൃത ഉൽപ്പന്നങ്ങൾ ഈ വർഷം ഏപ്രിലിൽ ഫേസ്ബുക്ക് പ്രഖ്യാപിച്ചിരുന്നു. ആൻഡ്രീസെൻ ഹൊറോവിറ്റ്സിന്റെ പിന്തുണയുള്ള ക്ലബ്‌ഹൗസ് ജനപ്രിയ സോഷ്യൽ ഓഡിയോ റൂമായി ഉയർന്നു വന്നതോടെയാണ് ഫേസ്ബുക്ക് ഈ മേഖലയിൽ കൂടുതൽ പ്രഖ്യാപനങ്ങൾ നടത്തിയത്. ക്ലബ്‌ഹൗസ് അടുത്തിടെ ലോകമെമ്പാടും ആൻഡ്രോയിഡ് ആപ്ലിക്കേഷൻ പുറത്തിറക്കിയിരുന്നു.

ട്വിറ്റർ നിലവിൽ ഇന്ത്യയിലെ എല്ലാ ഉപഭോക്താക്കൾക്കും ഓഡിയോ ചാറ്റ് റൂമായ സ്പെയ്സ് സേവനം വാ​ഗ്ദാനം ചെയ്യുന്നുണ്ട്. ഇന്ത്യക്ക് പുറത്ത്, 600 അല്ലെങ്കിൽ അതിൽ കൂടുതൽ ഫോളോവേഴ്സുള്ള ട്വിറ്റർ ഉപഭോക്താക്കൾക്ക് സ്പെയ്സ് ഹോസ്റ്റ് ചെയ്യാൻ കഴിയും. ഈ മാസം ആദ്യം, ഡെസ്ക്ടോപ്പിൽ നിന്നും മൊബൈൽ വെബ് ബ്രൗസറുകളിൽ നിന്നും ഈ തത്സമയ ഓഡിയോ ചാറ്റ് റൂമുകളിലേക്ക് പ്രവേശിക്കാൻ ട്വിറ്റർ ഉപയോക്താക്കളെ അനുവദിച്ചു തുടങ്ങി.