വാട്സാപ്പ് ചാനല്‍ ആർക്കൊക്കെ കിട്ടി? എങ്ങനെ ഉപയോഗിക്കാം?

WhatsApp ചാനലുകൾ എന്ന് വിളിക്കപ്പെടുന്ന ഈ ഫീച്ചർ ഒരു വൺ-വേ ബ്രോഡ്‌കാസ്റ്റ് ടൂളാണ്, അത് നിങ്ങളുടെ കുടുംബാംഗങ്ങളുമായും സുഹൃത്തുക്കളുമായും കമ്മ്യൂണിറ്റികളുമായും ഉള്ള ചാറ്റുകളിൽ നിന്ന് വേറിട്ട് അപ്‌ഡേറ്റുകൾ എന്ന പുതിയ ടാബിലാണ് ലഭ്യമാവുക. വാട്ട്‌സ്ആപ്പിനുള്ളിൽ ഒരു സ്ഥാപനത്തിനോ വ്യക്തിക്കോ തന്റെ സബ്‌സ്‌ക്രൈബര്‍മാരോട് കാര്യങ്ങൾ പങ്കുവയ്ക്കാനുള്ള ഒരു വൺ-വേ ബ്രോഡ്‌കാസ്റ്റ് ടൂളാണ് വാട്ട്സ്ആപ്പ് ചാനൽ. ടെലഗ്രാം ചാനലുകള്‍ക്ക് സമാനമായ ഫീച്ചറാണിത്. ഉപഭോക്താക്കള്‍ക്ക് വ്യക്തികളുടെയും സ്ഥാപനങ്ങളുടെയും ചാനലുകള്‍ സബസ്‌ക്രൈബ് ചെയ്യാനും അതിലൂടെ ലഭിക്കുന്ന അപ്‌ഡേറ്റുകള്‍ അറിയാനും സാധിക്കും. എന്നാൽ മറ്റ് ​ഗ്രൂപ്പുകളെ പോലെ എല്ലാവർക്കും ഇതിൽ സന്ദേശങ്ങൾ അയക്കാൻ സാധിക്കില്ല. അഡ്മിന്‍മാര്‍ക്ക് മാത്രമാണ് അതിനുള്ള അധികാരം.

ഇന്ത്യയിൽ നിന്നും ലോകമെമ്പാടുമുള്ള ചില പ്രമുഖ താരങ്ങൾ, സ്‌പോർട്‌സ് ടീമുകൾ, കലാകാരന്മാർ, ചിന്തകർ, നേതാക്കൾ, ഓർഗനൈസേഷനുകൾ എന്നിവ ഇതിനകം തന്നെ വാട്ട്‌സ്ആപ്പിൽ എത്തിക്കഴിഞ്ഞു. ഉദാഹരണത്തിന്, നിങ്ങൾക്ക് ഇന്ത്യൻ ക്രിക്കറ്റ് ടീമിനെ പിന്തുടരാം, ബോളിവുഡ് താരങ്ങളായ കത്രീന കൈഫ്, ദിൽജിത് ദോസഞ്ച്, അക്ഷയ് കുമാർ, വിജയ് ദേവേരകൊണ്ട, നേഹ കക്കർ എന്നിവരെയും. മാർക്ക് സക്കർബർഗിനെ വാട്ട്സാപ്പിൽ ഫോളോ ചെയ്‌താൽ അദ്ദേഹം ഫേസ്‌ബുക്ക് , വാട്ട്‌സ്ആപ്പ് ഉൽപ്പന്നങ്ങളുടെ അപ്‌ഡേറ്റുകൾ അവിടെ പങ്കിടുന്നത് കാണാം.

ഇമോജികൾ ഉപയോഗിച്ച് നിങ്ങൾക്ക് അപ്‌ഡേറ്റുകളോട് പ്രതികരിക്കാനും മൊത്തം വന്നിട്ടുള്ള പ്രതികരണങ്ങളുടെ എണ്ണം കാണാനും കഴിയും. നിങ്ങൾ എങ്ങനെ പ്രതികരിക്കുന്നു എന്നത് മറ്റുള്ളവർ കാണില്ല. ചാനലിലേക്കുള്ള ലിങ്ക് ഉപയോഗിച്ച് നിങ്ങൾക്ക് ചാറ്റുകളിലേക്കോ ഗ്രൂപ്പുകളിലേക്കോ അപ്‌ഡേറ്റുകൾ കൈമാറാനും കഴിയും, അതു വഴി കൂടുതൽ ആളുകൾക്ക് ചാനൽ കണ്ടെത്താനാകും. നിങ്ങൾക്ക് ഒരു ചാനൽ ഫോളോ ചെയ്യുന്നത് നിർത്തണമെങ്കിൽ, ഏത് സമയത്തും നിങ്ങൾക്ക് എളുപ്പത്തിൽ മ്യൂട്ട് ചെയ്യുകയോ അൺസബ്‌സ്‌ക്രൈബു ചെയ്യുകയോ ചെയ്യാം.