സ്മാർട്ട്‌ ഫോണുകളുടെ കാലം കഴിഞ്ഞോ? യുവതലമുറ ബേസ് മോഡൽ ഫോണുകൾ തിരഞ്ഞെടുക്കുന്നതിന് കാരണമെന്ത്?

ലോകം വിരൽത്തുമ്പിലെത്തുന്ന കാലത്ത് യുവതലമുറ സ്മാർട്ട്‌ ഫോണുകൾ ഉപേക്ഷിച്ച് ബേസ് മോഡൽ ഫോണുകൾ തിരഞ്ഞെടുക്കുന്നതായി റിപ്പോർട്ട്. സാമൂഹിക മാധ്യമങ്ങൾ ഉൾപ്പെടെയുള്ളവ മനസ്സിനും ശരീരത്തിനും ഏൽപ്പിക്കുന്ന ആഘാതങ്ങളിൽ നിന്നും മോചനം നേടുന്നതിനായാണ് ആളുകൾ ബേസ് മോഡലുകളിലേക്ക് ചേക്കേറുന്നതെന്നാണ് വിവരം. അമേരിക്ക ആസ്ഥാനമായി പ്രവർത്തിക്കുന്ന മൊബൈൽ വിൽപ്പന കേന്ദ്രങ്ങളിൽ അടുത്തിടെ ബേസ് മോഡൽ ആവശ്യപ്പെട്ട് എത്തുന്നവരുടെ എണ്ണം വർധിച്ചതായി മാധ്യമങ്ങൾ റിപ്പോർട്ട് ചെയതിരുന്നു. കൂടുതൽ സമയം സ്മാർട്ട്‌ ഫോൺ സ്ക്രീനുകൾക്ക് മുന്നിൽ ചെലവഴിക്കേണ്ടി വരുന്നത് ശരിയായ ഉറക്കത്തിന് തടസ്സമാവുകയും കൂടാതെ കഴുത്തിന് സാരമായ വേദനയുണ്ടാക്കുകയും ചെയ്യുന്നതാണ് ആളുകൾ ബേസ് മോഡലിലേക്ക് മാറാനുള്ള പ്രധാന കാരണമെന്ന് വിദഗ്ധർ പറയുന്നു.