കൈക്കൂലി വാങ്ങാൻ ശ്രമം; കണ്ണൂർ കോർപ്പറേഷൻ ഉദ്യോഗസ്ഥനും ഡ്രൈവറും പിടിയിൽ

അലവിൽ സ്വദേശി സഞ്ജയ്കുമാറാണ് പരാതി നൽകിയത്. ഭാര്യ സഹോദരിയുടെ പേരിൽ കെട്ടിടം നിർമ്മിക്കാൻ സഞ്ജയ് കുമാർ കണ്ണൂർ കോർപ്പറേഷനിൽ അപേക്ഷ നൽകിയിരുന്നു. അപേക്ഷയുടെ തുടർനടപടികൾക്കായി പലതവണ ഓഫീസിൽ കയറിയിറങ്ങിയെങ്കിലും ഫലമുണ്ടായില്ല.

ഉദ്യോഗസ്ഥൻ കൈക്കൂലിയായി 500 0രൂപ ആവശ്യപ്പെട്ടതോടെ സഞ്ജയ് കുമാർ വിജിലൻസിനെ സമീപിച്ചു. തുടർന്ന് വിജിലൻസ് ഇയാളെ 500 ന്റെ 10 നോട്ടുകൾ ഏൽപ്പിച്ചു. പണം ഡ്രൈവർ പ്രജീഷിനെ ഏൽപ്പിക്കാൻ ആയിരുന്നു രമേശ് ബാബു നിർദ്ദേശിച്ചിരുന്നത്.

പ്രജീഷിന് ആദ്യം വിളിച്ചപ്പോൾ പണവുമായി താണയിൽ എത്താൻ ആവശ്യപ്പെട്ടു. സഞ്ജയ് കുമാർ താണയിലെത്തി വിളിച്ചപ്പോൾ ശ്രീപുരം സ്കൂളിന് സമീപത്തു വരാൻ പറഞ്ഞു. അവിടെവച്ചാണ് ആണ് വിജിലൻസ് നൽകിയ 5000 രൂപ സഞ്ജയ് കുമാർ പ്രജീഷിന് നൽകിയത്. പണം കിട്ടിയ ഉടനെ ഡ്രൈവർ പ്രജീഷ് ഇടക്കാട് ഓഫീസിലേക്ക് വിളിച്ച് അറിയിച്ചു. അപ്പോഴേക്കും മറഞ്ഞുനിന്ന വിജിലൻസ് സംഘം ഇയാളെ പിടികൂടുകയായിരുന്നു.

ഇൻസ്‌പെക്ടർമാരായ എ.വി. ദിനേശ്, ടി.പി. സുമേഷ്, സബ് ഇൻസ്‌പെക്ടർമാരായ പങ്കജാക്ഷൻ, മഹേഷ് തുടങ്ങിയവരും സംഘത്തിൽ ഉണ്ടായിരുന്നു.