വിമർശനവുമായി വീണ്ടും കപിൽ സിബൽ; ലക്ഷ്യം കോൺഗ്രസ് സംഘടന തെരഞ്ഞെടുപ്പോ?

കോൺഗ്രസിലെ ജി23 ( ഗ്രൂപ്പ് 23) ലിസ്റ്റിലെ പ്രമുഖനാണ് കപിൽ സിബൽ. സോണിയഗാന്ധിയുടെ നേതൃത്വത്തെ  വിമർശിച്ച് തുറന്ന കത്ത് എഴുതിയ നേതാക്കളാണ് ഇപ്പോൾ പാർട്ടിയിൽ ജി23 എന്ന പേരിൽ അറിയപ്പെടുന്നത്. രാജ്യസഭയിലെ പ്രതിപക്ഷ നേതാവ് ഗുലാം നബി ആസാദ് മുതൽ തിരുവനന്തപുരം എം.പി ശശി തരൂർ വരെയുണ്ട് ജി23ൽ. സാധാരണയായി നേതൃത്വത്തിനെതിരെ ഇത്തരം വിമർശനമുയർത്തിയാൽ പിന്നെ അവർക്ക് പാർട്ടിയിൽ നിൽക്കുക എളുപ്പമല്ല. ഒരു ദാക്ഷണ്യവുമില്ലാതെ വെട്ടി ഒതുക്കപ്പെടുമെന്നതാണ് മുൻഅനുഭവം. പക്ഷെ ജി23 നേതാക്കൾക്കെതിരെ അത്തരം പടപുറപ്പാടിനൊന്നും  സോണിയ-രാഹുൽ ഭക്തർ മുതിർന്നില്ല.  അങ്ങനെയൊരു ആലോചന പോലും ഉണ്ടായില്ല. പഴയത് പോലെ നടപടികൾക്ക് പിന്തുണ ലഭിക്കുമെന്ന ഉറപ്പില്ലാത്തതാണ് കാരണം.

Also Read 'ബിജെപിക്ക് ബദലാകാൻ കോൺഗ്രസിന് കഴിയുന്നില്ല; ഇതു പറയാൻ വേദിയുമില്ല;' നേതൃത്വത്തിനെതിരെ വീണ്ടും കപിൽ സിബൽ

മഹാസഖ്യത്തിലെ പാർട്ടികളുടെ ഇത്തരം വിമർശനങ്ങൾക്ക് കരുത്ത് പകർന്നാണ് കോൺഗ്രസിലെ ജി23ൽ നിന്ന് കപിൽ സിബൽ എത്തിയിരിക്കുന്നത്. കപിൽ സിബലിന്റെ പുതിയ കലാപത്തിന് ലക്ഷ്യങ്ങൾ വേറെയുമുണ്ട്. ബീഹാർ തിരഞ്ഞെടുപ്പ് തോൽവി കാത്തിരുന്ന നിമിത്തം മാത്രമാണ്. കപിൽ സിബൽ അടക്കമുള്ളവർ ലക്ഷ്യമിടുന്നത് സംഘടന തെര‍ഞ്ഞെടുപ്പ് തന്നെയാണ്. ആ ലക്ഷ്യത്തിലേക്കെത്താൻ വേണ്ടിയാണ് ഈ നേതാക്കൾ  പ്രവർത്തകസമിതിയെ കടന്നാക്രമിക്കുന്നത്. നാമനിർദ്ദേശം ചെയ്യപ്പെട്ട്  പ്രവർത്തകസമിതിയിൽ എത്തിയിട്ടുള്ള നേതാക്കൾ കൂറുപുലർത്തി മിണ്ടാതിരിക്കുന്നതാണ് കോൺഗ്രസിലെ ഇപ്പോഴത്തെ പ്രതിസന്ധിയെന്നാണ് സിബലിന്റെ കുറ്റപ്പെടുത്തൽ.

നേതൃത്വത്തിന്റെ നിലപാടുകൾക്കും നടപടികൾക്കും എതിരെ തിരുത്തൽ ശക്തിയായി രംഗത്തെത്തിയ പുതിയ ഗ്രൂപ്പിന്റെ എണ്ണവും 23 ആണെനത് വെറും യാദൃശ്ചികമാണെന്ന് കരുതിയാലും ഇതിൽ നിന്ന് അര ഡസൻ പേരെയെങ്കിലും തെരഞ്ഞെടുപ്പിലൂടെ പ്രവർത്തകസമിതിയിൽ എത്തിക്കുകയെന്നത് തന്നെയാണ് കപിൽ സിബലിന്റെയും സംഘത്തിന്റെയും ശ്രമം. ഇതിനായി ഇപ്പോൾ സമ്മർദ്ദം ശക്തമാക്കുന്നതിലും കാര്യമുണ്ട്. ജനുവരിയിലാണ്  പുതിയ പാർട്ടി പ്രസിഡന്റിനെ തെരഞ്ഞെടുക്കേണ്ടത്. അത് അനിശ്ചിതമായി നീണ്ടു പോകരുത്. അതുപോലെ വീണ്ടും രാഹുൽ ഗാന്ധിയിലേക്കോ പ്രിയങ്ക ഗാന്ധിയിലേക്കോ കാര്യങ്ങൾ എത്തുന്ന അവസ്ഥയുണ്ടാകരുത്. ഇങ്ങനെ പരസ്യ പോരിന് പിന്നിലെ ലക്ഷ്യം പലതാണ്.

പാർട്ടിയെ കൈപ്പിടിയിൽ തന്നെ നിർത്തണമെങ്കിൽ  മത്സരിക്കേണ്ടി വരും. പക്ഷെ ആരിറങ്ങും? സോണിയഗാന്ധിക്ക് ആരോഗ്യ പ്രശ്നങ്ങളുണ്ട്. ഇനി പ്രസിഡന്റാകാനില്ലെന്ന പ്രഖ്യാപനം രാഹുൽ ഗാന്ധി തിരുത്തിയിട്ടുമില്ല. പ്രിയങ്ക ഗാന്ധിയാകട്ടെ  സംഘടന രംഗത്തോ തെരഞ്ഞെടുപ്പ് രംഗത്തോ കഴിവ് തെളിയിച്ചിട്ടുമില്ല. നിലവിലെ സാഹചര്യത്തിൽ സോണിയ ഗാന്ധിയുടെ അനുഗ്രഹത്തോടെ എത്തുന്ന സ്ഥാനാർഥിക്ക് തന്നെയാകും ഒരുപക്ഷെ വിജയം.

ജി23 നേതാക്കളുടെ കൂട്ടത്തിൽ നിന്ന് ആർക്കും മത്സരിക്കാം. എന്നാൽ ഔദ്ദ്യോഗികപക്ഷത്ത് നിന്ന് ആരെന്ന ചോദ്യത്തിന് ഇന്നത്തെ അവസ്ഥയിലും ഉയരുന്ന ആദ്യ പേര് രാഹുൽ ഗാന്ധിയുടേത് തന്നെയാകും. പിന്നാലെ ഉയരും  അനുനയിപ്പിക്കലിന്റെ മുറവിളി. ജി23 നേതാക്കളുടെ പുതിയ തിരക്കഥയെ പഴയ ഭക്തര്‍ എങ്ങനെ നേരിടും. ആ ഒരുക്കങ്ങളാകും  ഇനിയുള്ള ദിവസങ്ങളിൽ.