ഇറ്റലിയിൽ എസി മിലാൻ ചരിതം, 11 വർഷത്തിന് ശേഷം സീരി എ കിരീട൦ സ്വന്തം; പ്രീമിയർ ലീഗിൽ കിരീടം നിലനിർത്തി മാഞ്ചസ്റ്റർ സിറ്റി

മിലാൻ ടീമുകൾ തമ്മിലുള്ള കിടപ്പോരാട്ടമായി മാറിയിരുന്ന കിരീടപ്പോര് ലീഗിലെ അവസാന മത്സരം വരെ നീണ്ടതോടെ ഏത് മിലാൻ ടീമാകും കിരീടം ചൂടുകയെന്ന ആകാംക്ഷയിലായിരുന്നു ആരാധകർ. അവസാന മത്സരത്തിൽ സമനില കൊണ്ട് പോലും കിരീടം നേടാമെന്ന മുൻ‌തൂക്കം എസി മിലാനുണ്ടായിരുന്നു. എന്നാൽ സസോളയുടെ പോസ്റ്റിൽ അവർ മൂന്ന് ഗോളുകളാണ് കോരിയിട്ടത്. ഇരട്ട ഗോളുകൾ നേടിയ ഫ്രഞ്ച് താരം ഒലിവർ ജിറൂദാണ് മിലാന്റെ ജയം ആധികാരികമാക്കിയത്. മൂന്നാം ഗോൾ ഫ്രാങ്ക് കെസ്സിയയുടെ ബൂട്ടിൽ നിന്നായിരുന്നു. 38 മത്സരങ്ങളിൽ നിന്നും 86 പോയിന്റുമായാണ് മിലാൻ സീരി എയിലെ തങ്ങളുടെ 19-ാ൦ കിരീടം ചൂടിയത്.

അവസാന മത്സരത്തിൽ ഇന്റർ മിലാനും (Inter Milan) ജയം നേടിയെങ്കിലും എസി മിലാൻ ജയിച്ചതോടെ അവർക്ക് കിരീടം രണ്ട് പോയിന്റ് അകലെ നഷ്ടമാവുകയായിരുന്നു. കഴിഞ്ഞ സീസണിൽ കിരീടമുയർത്തിയ ഇന്റർ എതിരില്ലാത്ത മൂന്ന് ഗോളിന് സാംപ്ദോറിയയെ തോൽപിച്ചു. യോക്വിം കൊറേയ നേടിയ ഇരട്ട ഗോളുകളുടെ മികവിലാണ് ഇന്ററിന്റെ ജയം. ഇവാൻ പെരിസിച്ചാണ് ഇന്ററിനായി ആദ്യ ഗോൾ നേടിയത്. 84 പോയിന്റുമായാണ് ഇന്റർ രണ്ടാം സ്ഥാനത്തെത്തിയത്.

മത്സരത്തിൽ നേടിയ ജയത്തോടെ മൊത്തം 93 പോയിന്റ് നേടിയ സിറ്റി രണ്ടാം സ്ഥാനത്തുള്ള ലിവർപൂളിനെ (Liverpool) കേവലം ഒരു പോയിന്റിന് മറികടന്നാണ് കിരീടം ചൂടിയത്. ലിവർപൂളിന് 92 പോയിന്റാണ് ഉണ്ടായിരുന്നത്. വോൾവ്‌സിനെതിരായ അവസാന മത്സരത്തിൽ ഒന്നിനെതിരെ മൂന്ന് ഗോളുകളുടെ ജയമാണ് ചെമ്പട നേടിയത്. ആസ്റ്റൺ വില്ലയ്‌ക്കെതിരെ സിറ്റി തോൽവി വഴങ്ങിയിരുന്നെങ്കിൽ ലിവർപൂളിന് കിരീടം ചൂടാനുള്ള അവസരമുണ്ടായിരുന്നു.