Euro Cup| ഇംഗ്ലണ്ട് ടീമിനെ പ്രഖ്യാപിച്ച് ഗാരത് സൗത്ത്ഗേറ്റ്; ജെസ്സി ലിംഗാർഡ് പുറത്ത്

ഈ മാസം ആരംഭിക്കുന്ന യൂറോ കപ്പിനുള്ള 26 അംഗ ഇംഗ്ലണ്ട് ഫുട്ബോൾ ടീമിനെ പ്രഖ്യാപിച്ച് പരിശീലകൻ ഗാരത് സൗത്ത്ഗേറ്റ്. സൗത്ത്ഗേറ്റ് പ്രഖ്യാപിച്ച ടീം ഒരാളുടെ അഭാവം കൊണ്ട് ശ്രദ്ധേയമായി. ഇംഗ്ലീഷ് പ്രീമിയർ ലീഗിൽ ഈ സീസണിൽ വെസ്റ്റ് ഹാമിനായി മികച്ച പ്രകടനം പുറത്തെടുത്ത ജെസ്സി ലിംഗാർഡാണ് ടീമിൽ ഇടംപിടിക്കാതിരുന്ന പ്രധാന താരം. നേരത്തെ പ്രഖ്യാപിച്ചിരുന്ന 33 അംഗ പ്രൊവിഷണൽ സ്ക്വാഡിൽ നിന്ന് ഏഴ് പേരെ ഒഴിവാക്കിയാണ് പരിശീലകൻ ഗാരത് സൗത്ത്ഗേറ്റിന്റെ ടീം പ്രഖ്യാപനം. ജെസി ലിംഗാർഡ്, മേസൺ ഗ്രീൻ വുഡ് എന്നിവരാണ് പ്രൊവിഷണൽ സ്ക്വാഡിലുണ്ടായിരുന്ന, ഇപ്പോൾ അന്തിമ‌ടീമിൽ നിന്ന് ഒഴിവാക്കപ്പെട്ട പ്രധാന താരങ്ങൾ. ഇതിൽ ഗ്രീൻവുഡ്, പരുക്കിനെത്തുടർന്ന് യൂറോ ടീമിൽ നിന്ന് പിന്മാറാൻ നേരത്തെ സ്വയം തീരുമാനിച്ചിരുന്നു.