IND vs SA | വിജയ് ഹസാരെയിൽ തകർപ്പൻ ഫോമിൽ; വെങ്കടേഷ് അയ്യരും ഋതുരാജ് ഗെയ്ക്‌വാദും ഏകദിന ടീമിലേക്ക്; റിപ്പോർട്ട്

വിജയ് ഹസാരെയില്‍ വെങ്കടേഷ് അയ്യർ ഇതുവരെ രണ്ട് സെഞ്ചുറികളാണ് നേടിയത്. ഇതിൽ ഒരെണ്ണം കേരളത്തിനെതിരെയായിരുന്നു. 84 പന്തില്‍ 112 റണ്‍സാണ് താരം നേടിയ അയ്യരുടെ മികവിൽ മധ്യപ്രദേശ് കേരളത്തിനെതിരെ വിജയം നേടിയിരുന്നു. മത്സരത്തിൽ മൂന്ന് വിക്കറ്റും താരം സ്വന്തമാക്കിയിരുന്നു. പിന്നാലെ ഉത്തരാഖണ്ഡിനെതിരെ നടന്ന മത്സരത്തിൽ 49 പന്തില്‍ 71 റണ്‍സും രണ്ട് വിക്കറ്റും സ്വന്തമാക്കി. ഇന്നലെ ഉത്തര്‍ പ്രദേശിനെതിരെയും താരം സെഞ്ചുറി നേടി. മധ്യനിരയില്‍ ബാറ്റ് ചെയ്ത താരം 113 പന്തില്‍ 151 റണ്‍സ് അടിച്ചെടുക്കുകയും രണ്ട് വിക്കറ്റ് വീഴ്ത്തുകയും ചെയ്തു.

വെങ്കടേഷ് അയ്യരുടെ ഈ ഓൾ റൗണ്ട് പ്രകടനമാണ് സെലക്ടർമാരെ ആകര്‍ഷിക്കുന്നത്. ഹാര്‍ദിക്ക് പാണ്ഡ്യ ഫിറ്റ്നസ് പ്രശ്നങ്ങൾ നേരിടുന്നതിനാൽ നിലവിൽ ഇന്ത്യക്ക് ഒരു പേസ് ഓൾ റൗണ്ടറെ ആവശ്യമാണ്. അതുകൊണ്ട് തന്നെ ഹാർദിക്കിന് പകരക്കാരനായി വെങ്കടേഷിനെ ടീമിലുള്‍പ്പെടുത്താനാണ് സെലക്ഷന്‍ കമ്മിറ്റിയുടെ ആലോചന.

വിജയ ഹസാരെയിൽ ഹാട്രിക്ക് സെഞ്ചുറികള്‍ നേടി സ്ഥിരതയുടെ പര്യായമായി മാറിയ മഹരാഷ്ട്ര ക്യാപ്റ്റന്‍ ഋതുരാജിനും ഏകദിന ടീമില്‍ ഇടം ലഭിച്ചേക്കും. കേരളത്തിനെതിരെ 129 പന്തില്‍ 124 റണ്‍സ് നേടിയായിരുന്നു ഋതുരാജിന്റെ തുടക്കം. പിന്നാലെ ഛത്തീസ്ഗഢിനെതിരെ 143 പന്തില്‍ പുറത്താവാതെ 154 റണ്‍സ് നേടി. മധ്യപ്രദേശിനെതിരെ 136 റണ്‍സും താരം സ്വന്തമാക്കി. മൂന്ന് മത്സരങ്ങളിലും ബൗളർമാരെ ആധികാരിതയോടെ നേരിട്ട് മുന്നേറി സെഞ്ചുറികൾ സ്വന്തമാക്കിയ താരത്തിന്റെ പ്രകടനം കണ്ടില്ലെന്ന് നടിക്കാൻ സെലക്ഷൻ കമ്മിറ്റിക്ക് കഴിയില്ല.

Also read- Rohit Sharma |'ഐപിഎല്ലിൽ അഞ്ച് കിരീടങ്ങൾ; കോഹ്‌ലിയില്ലാതെ ഏഷ്യ കപ്പ് നേട്ടം'; രോഹിത് ശർമയെ ക്യാപ്റ്റനാക്കിയതിനെ കുറിച്ച് ഗാംഗുലി

Also read- IND vs SA | ദക്ഷിണാഫ്രിക്കൻ പര്യടനത്തിനുള്ള ഇന്ത്യൻ ടീമിനെ പ്രഖ്യാപിച്ചു; രഹാനെയ്ക്ക് പകരം രോഹിത് ശർമ വൈസ് ക്യാപ്റ്റൻ

ടെസ്റ്റ് പരമ്പരയ്ക്കുള്ള 18 പേരുള്‍പ്പെട്ട സംഘത്തെ ചേതന്‍ ശര്‍മയുടെ കീഴിലുള്ള സെലക്ഷന്‍ കമ്മിറ്റി ഈയാഴ്ച പ്രഖ്യാപിച്ചിരുന്നു. എന്നാല്‍ ഏകദിന ടീമിനെ പ്രഖ്യാപിച്ചിട്ടില്ല. വരും ദിവസങ്ങളില്‍ ഏകദിന ടീമിന്റെയും പ്രഖ്യാപനമുണ്ടാവുമെന്നാണ് വിവരം.