IND vs AUS 2nd Test| രണ്ടാം ടെസ്റ്റില്‍ രാഹുല്‍ ഓപ്പണ്‍ ചെയ്യും; രോഹിത് ശര്‍മ മധ്യനിരയില്‍

ഓസ്‌ട്രേലിയക്കെതിരായ പെര്‍ത്തിലെ ഒന്നാം ടെസ്റ്റില്‍ ഇന്ത്യക്കായി ഓപ്പണ്‍ ചെയ്തത് കെ എല്‍ രാഹുലും യശസ്വി ജയ്സ്വാളുമായിരുന്നു. ആദ്യ ടെസ്റ്റില്‍ രോഹിത് ശര്‍മയുടെ അഭാവത്തിലാണ് രാഹുല്‍ ഓപ്പണറായി വന്നത്. ആദ്യ ടെസ്റ്റിന്റെ രണ്ടാം ഇന്നിങ്‌സില്‍ സഖ്യം ക്ലിക്കാകുകയും ചെയ്തിരുന്നു. രണ്ടാം ടെസ്റ്റില്‍ രോഹിത് ഇറങ്ങുന്നതോടെ ഓപ്പണിങ് സഖ്യം ആരായിരിക്കുമെന്ന ആകാംക്ഷയും ഉയന്നിരുന്നു.

അഡ്ലെയ്ഡ് ടെസ്റ്റില്‍ രാഹുല്‍- യശസ്വി സഖ്യമായിരിക്കും ഇന്ത്യക്കായി ഓപ്പണ്‍ ചെയ്യുക എന്നു നായകന്‍ വ്യക്തമാക്കി. രാഹുല്‍ ഓപ്പണ്‍ ചെയ്യും. താന്‍ മധ്യനിരയില്‍ ഏതെങ്കിലും സ്ഥാനത്തിറങ്ങുമെന്നും നായകന്‍ വ്യക്തമാക്കി. രാഹുല്‍ ആദ്യ മത്സരത്തിൽ വളരെ നന്നായി കളിച്ചുവെന്നും ബാറ്റിങ് ഓർഡറിൽ മാറ്റംവരുത്തേണ്ട സാഹചര്യമില്ലെന്നും രോഹിത് പറഞ്ഞു.

32കാരനായ കെ എൽ രാഹുൽ 2014 ഡിസംബറിലാണ് ടെസ്റ്റിൽ ഇന്ത്യക്കായി അരങ്ങേറിയത്. ഓസ്ട്രേലിയക്കെതിരെ പെർത്തിലെ ടെസ്റ്റിൽ ആദ്യ ഇന്നിങ്സിൽ 26 റൺസും രണ്ടാം ഇന്നിങ്സിൽ 77 റൺസും നേടിയിരുന്നു. 295 റൺസിന് ഇന്ത്യ വിജയിച്ച ആദ്യ മത്സരത്തിൽ, യശസ്വി ജയ്സ്വാൾ- രാഹുൽ സഖ്യം ഒന്നാം വിക്കറ്റിൽ 201 റൺസും കൂട്ടിച്ചേർത്തിരുന്നു.

വെള്ളിയാഴ്ച മുതല്‍ പകല്‍- രാത്രി പോരാട്ടമാണ് രണ്ടാം ടെസ്റ്റില്‍ അരങ്ങേറുന്നത്. പിങ്ക് പന്തിലാണ് പോരാട്ടം. 5 മത്സരങ്ങളടങ്ങിയ പരമ്പരയില്‍ ഇന്ത്യ 1-0ത്തിനു മുന്നിലാണ്.

Summary: Indian skipper Rohit Sharma confirmed that KL Rahul will open the innings for India in the second Test against Australia. The second Test of the ongoing five-match series between India and Australia is scheduled to take place at Adelaide Oval from December 6 to 10. It is going to be a day-night game and will be played with a pink ball.