Neymar | എതിർ താരത്തിന്റെ ഫൗൾ; നെയ്മർക്ക് ഗുരുതര പരിക്ക്; ജയത്തിനിടയിൽ പിഎസ്ജിക്ക് തിരിച്ചടി

എതിർ താരത്തിന്റെ ഫൗളിൽ നിലത്തുവീണ നെയ്മർ വേദന കൊണ്ട് പുളയുകയും തുടർന്ന് പിഎസ്ജിയുടെ മെഡിക്കൽ സംഘം എത്തി പ്രാഥമിക ചികിത്സ നൽകിയ ശേഷം താരത്തെ സ്‌ട്രെച്ചറിൽ കിടത്തി പുറത്തേക്ക് കൊണ്ടുപോവുകയായിരുന്നു. പരിക്ക് ഗുരുതരമായതിനാൽ സീസണിൽ ശേഷിച്ച മത്സരങ്ങൾ താരത്തിന് നഷ്ടപ്പെടാൻ സാധ്യതയുണ്ട് എന്നാണ് വിലയിരുത്തൽ.

പരിക്ക് കൂടുതൽ സാരമുള്ളതും ശസ്ത്രക്രിയ ആവശ്യം വരുന്നതുമാണെങ്കിൽ പുതുവർഷം വരെയുള്ള മത്സരങ്ങൾ താരത്തിന് നഷ്ടമായേക്കും. എന്നാൽ താരത്തെ സ്കാനിങ്ങിന് വിധേയമാക്കി പരിക്ക് എത്രത്തോളം സാരമുള്ളതാണെന്ന് കണ്ടെത്തിയാൽ മാത്രമേ താരത്തിന് എത്ര കാലം വിശ്രമം വേണ്ടി വരുമെന്നതിൽ സ്ഥിരീകരണം നൽകാൻ സാധ്യമാവുകയുള്ളൂ.

എന്നാൽ കൂടുതൽ മത്സരങ്ങൾ താരത്തിന് നഷ്ടമാവുകയാണെങ്കിൽ പിഎസ്ജിക്ക് വലിയ തിരിച്ചടിയാകും അത് നൽകുക. മെസ്സി - നെയ്മർ - എംബാപ്പെ ത്രയത്തെ മുൻനിർത്തി സീസണിലേക്കുള്ള തന്ത്രങ്ങൾ മെനഞ്ഞ പരിശീലകൻ മൗറീഷ്യോ പോച്ചട്ടീനോയ്ക്കും വലിയ തിരിച്ചടിയാണ് ബ്രസീലിയൻ താരത്തിന്റെ പരിക്ക്. പുതിയ സീസൺ അതിന്റെ തുടക്കത്തിൽ നിൽക്കുമ്പോൾ നെയ്മർക്ക് പറ്റിയ ഈ ഗുരുതര പരിക്ക് താരത്തിന് സീസണിലെ ബാക്കി മത്സരങ്ങൾ നഷ്ടമാകുമോ എന്ന ആശങ്കയിലാണ് പിഎസ്ജി മാനേജ്‌മെന്റ്.

പിഎസ്ജിക്ക് വേണ്ടി ഈ സീസണിലെ 14ാമത്തെ മത്സരമാണ് സെന്റ് ഏറ്റിയനെതിരെ നെയ്മർ കളിച്ചത്. സീസണിൽ ഇതുവരെയായി പിഎസ്ജിക്ക് വേണ്ടി മൂന്ന് ഗോളുകളും മൂന്ന് അസിസ്റ്റുകളും അദ്ദേഹം നേടിയിട്ടുണ്ട്.

വിജയത്തോടെ ഫ്രഞ്ച് ലീഗിൽ 15 മത്സരങ്ങളിൽ നിന്നും 40 പോയിന്റുമായി പിഎസ്‌ജി ബഹുദൂരം മുന്നിലായി ഒന്നാം സ്ഥാനത്ത് തുടരുന്നു. രണ്ടാം സ്ഥാനത്തുള്ള നീസിന് അത്രയും മത്സരങ്ങളിൽ നിന്നും 26 പോയിന്റുകൾ മാത്രമാണുള്ളത്.