ഹലോ മിസ്റ്റര്‍ പെരേര, താങ്കള്‍ ലങ്കയ്ക്കായി നേടിയത് വെറും ജയമല്ല; ചരിത്ര നേട്ടം

പുറത്താകാതെ 153 റണ്‍സായിരുന്ന പെരേര മത്സരത്തില്‍ അടിച്ച് കൂട്ടിയത്. ദക്ഷിണാഫ്രിക്കന്‍ മണ്ണിലെ ഒരു ഏഷ്യന്‍ താരത്തിന്റെ മികച്ച പ്രകടനമായിരുന്നു പെരേരയുടെ ഈ ഇന്നിങ്‌സ്. പോര്‍ട്ടീസ് മണ്ണില്‍ ടെസ്റ്റ് ക്രിക്കറ്റിലെ നാലാം ഇന്നിങ്‌സില്‍ സെഞ്ച്വറി നേടുന്ന ആദ്യ ഏഷ്യന്‍ താരമെന്ന നേട്ടമാണ് പെരേരയ്ക്ക് സ്വന്തമായിരിക്കുന്നത്. 1995 ല്‍ ജൊഹന്നാസ്ബര്‍ഗില്‍ നടന്ന മത്സരത്തില്‍ പാകിസ്താന്‍ മുന്‍ നായകന്‍ ഇന്‍സമാമം ഉള്‍ ഹഖ് നേടിയ 95 റണ്‍സാണ് ഇതോടെ പഴങ്കഥയായത്.

ഒന്നാം ടെസ്റ്റിലെ പത്താം വിക്കറ്റില്‍ ഫെര്‍ണാണ്ടോയുമൊത്ത് 78 റണ്‍സ് പെരേര സ്‌കോര്‍ബോര്‍ഡില്‍ ചേര്‍ത്തപ്പോള്‍ അതില്‍ വെറും ആറ് റണ്‍സായിരുന്നു ഫെര്‍ണാണ്ടോയുടെ സമ്പാദ്യം. 48 റണ്‍സെടുത്ത ധനഞ്ജയ ഡി സില്‍വയും ലങ്കന്‍ വിജയത്തില്‍ നിര്‍ണായകമായി.