യുഎസില്‍ പലസ്തീന്‍ അനുകൂല പ്രതിഷേധത്തില്‍ പങ്കെടുത്ത ഇന്ത്യന്‍ വിദ്യാര്‍ത്ഥിനി അറസ്റ്റില്‍; സർവകലാശാലയിൽ നിന്ന് പുറത്താക്കി

പലസ്തീന്‍ അനുകൂല പ്രതിഷേധത്തില്‍ പങ്കെടുത്തെന്നാരോപിച്ച് യുഎസില്‍ ഇന്ത്യന്‍ വംശജരായ വിദ്യാര്‍ത്ഥികളെ അറസ്റ്റ് ചെയ്തു. യുഎസിലെ പ്രിന്‍സ്റ്റണ്‍ യൂണിവേഴ്‌സിറ്റിയിലെ വിദ്യാര്‍ത്ഥികളെയാണ് പോലീസ് അറസ്റ്റ് ചെയ്തത്. കോയമ്പത്തൂര്‍ സ്വദേശിനിയായ അചിന്ത്യ ശിവലിംഗന്‍, ഹസന്‍ സെയ്ദ് എന്നിവരാണ് അറസ്റ്റിലായത്. യൂണിവേഴ്‌സിറ്റി മുറ്റത്ത് ടെന്റുകള്‍ കെട്ടി പ്രതിഷേധം നടത്തുന്നതിനിടെയാണ് ഇവര്‍ അറസ്റ്റിലായത്. എന്നാല്‍ യൂണിവേഴ്‌സിറ്റി പരിസരത്ത് ടെന്റുകള്‍ കെട്ടരുതെന്ന് പൊതുസുരക്ഷാ വകുപ്പ് കര്‍ശന നിര്‍ദ്ദേശം നല്‍കിയിരുന്നുവെന്നും അത് ലംഘിച്ചതിനാണ് വിദ്യാര്‍ത്ഥികള്‍ അറസ്റ്റിലായതെന്നും യൂണിവേഴ്‌സിറ്റി വക്താവ് ജെന്നിഫര്‍ മോറില്‍ പറഞ്ഞു.