'57 വയസുള്ള ഞാൻ 25 കാരിയെ വിവാഹം ചെയ്യുന്നതിൽ മറ്റുള്ളവർക്കെന്ത്?': നടൻ ബബ്ലൂ പൃഥ്വിരാജ്

കഴിഞ്ഞ നാൽപതു വർഷമായി തെന്നിന്ത്യന്‍ സിനിമയിലെ വിവിധഭാഷകളില്‍ അഭിനയിച്ചിട്ടുള്ള നടനാണ് ബബ്ലൂ പൃഥ്വിരാജ്. മലയാളത്തില്‍ വാസവദത്ത, ബെസ്റ്റ് ഫ്രണ്ടസ്, ഓ ലൈല ഓ എന്ന ചിത്രങ്ങളില്‍ വേഷമിട്ടിട്ടുണ്ട്. സിനിമ കൂടാതെ ടെലിവിഷന്‍ രംഗത്തും സജീവമായി പ്രവര്‍ത്തിക്കുന്ന നടന്‍ കൂടിയാണ് പൃഥ്വിരാജ്.

ഇപ്പോള്‍ 57 കാരനായ നടന്റെ രണ്ടാം വിവാഹവാര്‍ത്ത വലിയ ചര്‍ച്ചയാവുകയാണ്. 25 കാരിയായ ശീതള്‍ എന്ന പെണ്‍കുട്ടിയുമായി പ്രണയത്തിലാണ് താനെന്ന് നടന്‍ പറയുന്നു. വ്യക്തിപരമായ കാര്യമാണെന്നും വിമര്‍ശനങ്ങളെ കാര്യമാക്കുന്നില്ലെന്നും അദ്ദേഹം ഈയിടെ നല്‍കിയ ഒരു അഭിമുഖത്തില്‍ പറഞ്ഞു.

1994 ലായിരുന്നു പൃഥ്വിരാജിന്റെ ആദ്യ വിവാഹം. ഈ ബന്ധം ആറ് വര്‍ഷങ്ങള്‍ക്ക് മുന്‍പാണ് അവസാനിച്ചത്.

''വിവാഹമോചിതനാണ് ഞാന്‍. എനിക്ക് പ്രായം കൂടുതലാണെന്ന് ശീതളിന് അറിയാം. അവര്‍ക്കോ അവരുടെ മാതാപിതാക്കള്‍ക്കോ അതില്‍ എതിര്‍പ്പില്ല. എനിക്ക് അന്‍പത്തിയേഴ് വയസ്സായെന്ന ബോധ്യമുണ്ട്. മറ്റുള്ളവരുടെ വിമര്‍ശനങ്ങളെ എന്തിന് ഭയക്കണം''- പൃഥ്വിരാജ് ചോദിക്കുന്നു.

ശീതളിനൊപ്പമുള്ള ചിത്രം പൃഥ്വിരാജ് പങ്കുവച്ചിട്ടുണ്ട്. അവള്‍ എല്ലായ്‌പ്പോഴും എനിക്കൊപ്പം എന്ന കുറിപ്പോടെയാണ് ചിത്രം പങ്കുവച്ചിരിക്കുന്നത്.