ഇതെന്റെ പുത്തൻ റെയ്ബാൻ ഗ്ലാസ്! മമ്മൂട്ടിയുടെ സ്നേഹ സമ്മാനവുമായി രമേശ് പിഷാരടി

മെഗാസ്റ്റാർ മമ്മൂട്ടിക്ക് കൂളിങ് ഗ്ലാസുകളോടുള്ള കമ്പം എല്ലാവർക്കും അറിയാവുന്നതാണ്. ''ഞാന്‍ എപ്പോഴും കൂളിങ് ഗ്ലാസ് വെക്കുന്ന ഒരാളാണ്, അത് തന്റെ ശരീരവുമായി ചേര്‍ന്നു കിടക്കുകയാണ്''- മമ്മൂട്ടി തന്നെ ഒരു അഭിമുഖത്തിൽ പറഞ്ഞിരുന്നു.

കൂളിങ് ഗ്ലാസുകളുടെ വലിയ ഒരു ശേഖരം തന്നെ മമ്മൂട്ടിക്കുണ്ട്. ഇപ്പോള്‍ നടൻ രമേശ് പിഷാരടിക്ക് കൂളിങ് ഗ്ലാസ് സമ്മാനമായി നൽകിയിരിക്കുകയാണ് മലയാളത്തിന്റെ മെഗാസ്റ്റാർ.

രമേശ് പിഷാരടി തന്നെയാണ് സമ്മാനം ലഭിച്ചകാര്യം വെളിപ്പെടുത്തിയത്. മമ്മൂട്ടി സമ്മാനം നൽകിയ കൂളിങ് ഗ്ലാസ് വച്ചുള്ള രമേശ് പിഷാരടിയുടെ ചിത്രമാണ് സമൂഹമാധ്യമങ്ങളിൽ വൈറൽ.

''മമ്മൂക്കയിൽ നിന്നുള്ള ഗിഫ്റ്റ്. നന്ദി പറയുന്നത് ഔപചാരികതയാകും. എല്ലാറ്റിനോടും നന്ദി പറയുന്നു''- രമേശ് പിഷാരടി ചിത്രങ്ങൾക്കൊപ്പം കുറിച്ചു.

രസകരമായ കമന്റുകളാണ് പിഷാരടിയുടെ ചിത്രത്തിന് ലഭിക്കുന്നത്. ''റോളക്സ് വാച്ച് പോയെങ്കിലെന്താ റെയ്ബാൻ കിട്ടിയില്ലേ, പുതു പുത്തൻ റെയ്‌ബാൻ ഗ്ലാസ്'' എന്നിങ്ങനെ പോകുന്നു കമന്റുകൾ. അടുത്തിടെ റോഷാക്കിന്റെ വിജയാഘോഷത്തിനിടെ നടൻ ആസിഫ് അലിക്ക് മമ്മൂട്ടി വിലയേറിയ റോളക്സ് വാച്ച് സമ്മാനമായി നൽകിയിരുന്നു.