പത്ത് ഇഞ്ച് ഉയരം, നാലര കിലോ തൂക്കം; അയോധ്യ രാമക്ഷേത്ര മാതൃകയില്‍ ക്രിസ്മസ് കേക്ക് തയ്യാറാക്കി യുവതി

സിലിഗുരി: ഉത്തര്‍പ്രദേശിലെ അയോധ്യയില്‍ രാമക്ഷേത്രനിര്‍മാണം ഏകദേശം പൂര്‍ത്തിയായിക്കൊണ്ടിരിക്കുകയാണ്.  ജനുവരി അവസാനത്തോടെ ക്ഷേത്രത്തിന്റെ ഉദ്ഘാടനം നടത്തപ്പെടും. ഇപ്പോഴിതാ അയോധ്യ രാമക്ഷേത്രത്തിന്റെ മാതൃകയില്‍ നിര്‍മിച്ച ക്രിസ്മസ് കേക്കാണ് ശ്രദ്ധ നേടുന്നത്.

പശ്ചിമബംഗാളിലെ സിലിഗുരി സ്വദേശിയായ പ്രിയങ്ക ഡെയാണ് ഈ കേക്ക് നിര്‍മിച്ചിരിക്കുന്നത്. ഏറെക്കാലമായി വീട്ടിലിരുന്ന് കേക്ക് തയ്യാറാക്കുന്ന പ്രിയങ്കയുടെ രാമക്ഷേത്ര മാതൃകയിലുള്ള കേക്കിന് വലിയ തോതിലുള്ള പ്രശംസയാണ് ലഭിക്കുന്നത്.

രാമക്ഷേത്രത്തിന്റെ മാതൃകയില്‍ നിര്‍മിച്ച പൂജാ മണ്ഡപത്തിന്റെയും നെക്ലേസിന്റെയും രൂപത്തിലുള്ള കേക്കുകൾ നേരത്തെ ശ്രദ്ധ നേടിയിരുന്നു. അയോധ്യയിലെ രാമക്ഷേത്രത്തിന്റെ ചെറിയൊരു പതിപ്പാണ് പ്രിയങ്ക നിര്‍മിച്ച കേക്ക്.

കേക്കില്‍ രാമക്ഷേത്രത്തിന്റെ മുക്കും മൂലയും വളരെ കൃത്യതയോടെയാണ് പ്രിയങ്ക നിര്‍മിച്ചിരിക്കുന്നത്. 4.5 കിലോയാണ് കേക്കിന്റെ തൂക്കം. പത്ത് ഇഞ്ച് ഉയരവും 14 ഇഞ്ച് വീതിയുമുണ്ട്. മുഴുവന്‍ കേക്കും ഭക്ഷ്യയോഗ്യമാണെന്നും പ്രിയങ്ക പറയുന്നു.

ജനുവരി 22-ന് രാമക്ഷേത്രം ഉദ്ഘാടനം ചെയ്യുകയാണ്. ഈ വേളയിലാണ് പുതിയതായി എന്തെങ്കിലും ചെയ്യാന്‍ ഞാന്‍ തീരുമാനിച്ചത്.

ഇന്ത്യന്‍ ജനതയുടെ വികാരമാണ് രാമക്ഷേത്രം. ഇതിനാലാണ് രാമക്ഷേത്രത്തിന്റെ മാതൃകയില്‍ കേക്ക് നിര്‍മിച്ചതെന്നും പ്രിയങ്ക കൂട്ടിച്ചേർത്തു.

രണ്ട് ദിവസമെടുത്താണ് ഈ കേക്ക് നിര്‍മിച്ചത്. കേക്കില്‍ രാമക്ഷേത്ത്രിന്റെ ഘടന കൃത്യമായി നിര്‍മിച്ചെടുക്കാന്‍ കുറച്ചു സമയമെടുത്തുവെന്നും അവര്‍ പറഞ്ഞു.

ഇതിന് മുമ്പ് അവതാര്‍ തീമില്‍ കേക്ക് നിര്‍മിച്ചിരുന്നു. ഭാവിയില്‍ പുതിയൊരു ആശയം ലഭിച്ചാല്‍ അതുണ്ടാക്കാന്‍ ശ്രമിക്കുമെന്നും പ്രിയങ്ക കൂട്ടിച്ചേര്‍ത്തു.