ഒരാളെ ജോലിക്ക് എടുക്കണ്ടെന്നു തീരുമാനിച്ചത് അഞ്ചു മിനിട്ട് കൊണ്ട്; റെഡ്ഡിറ്റ് പുറത്തുവിട്ട ട്രിക് ടെസ്റ്റ് വൈറൽ

ജോലിക്ക് വേണ്ടിയുള്ള അഭിമുഖത്തിന് എത്തുന്നവരുടെയെല്ലാം മനസിൽ ഭയമുണ്ടെന്നത് ഒരു യാഥാർഥ്യമാണ്. എന്നാൽ ഒരു ജോലിക്ക് അപേക്ഷിക്കുമ്പോൾ ഉദ്യോഗാർഥിക്ക് വേണ്ട ഏറ്റവും പ്രധാനപ്പെട്ട ഗുണം മറ്റുള്ളവരെ ബഹുമാനിക്കാനുള്ള മനസുണ്ടാകുകയെന്നതാണ്.

ഇത്തരത്തിൽ ഭിമുഖത്തിനെത്തിയ ഒരാൾക്ക് അഞ്ച് മിനിട്ടു കൊണ്ട് ജോലി നൽകേണ്ടെന്ന തീരുമാനത്തിൽ എത്തിച്ച ട്രിക് ടെസ്സ്റ്റാണ് ഓൺലൈൻ കൂട്ടായ്മയായ റെഡ്ഡിറ്റ് പങ്കുവച്ചിരിക്കുന്നത്. റെഡ്ഡിറ്റ് പങ്കുവച്ച ഈ ട്രിക് ടെസ്റ്റ് നിമിഷങ്ങൾക്കുള്ളിൽ ഓൺലൈനിൽ വൈറലായി

അഭിമുഖത്തിനായി ഓഫീസിലേക്ക് പ്രവേശിച്ച് അഞ്ച് മിനിട്ടിനുള്ളിൽ ഒരാൾക്ക് എങ്ങനെയാണ് ജോലി നിരസിക്കപ്പെടുന്നതെന്ന കുറിപ്പ് റെഡ്ഡിറ്റ് ഉപയോക്താവ് കൂട്ടായ്മയിൽ പങ്കുവച്ചത്. ഓഫീസിലേക്കെത്തിയ ഉദ്യോഗാർഥിയെ റിസപ്ഷനിസ്റ്റാണ് സ്വീകരിച്ചത്.

എന്നാൽ റിസപ്ഷനിസ്റ്റിനോടുള്ള ഇയാളുടെ പെരുമാറ്റം വളരെ മോശമായിരുന്നു. അതേസമയം റിസപ്ഷനിസ്റ്റായി എത്തിയത് ശരിക്കും ആ സ്ഥാപനത്തിലെ മാനേജർ ആയിരുന്നു. ഉദ്യോഗാർഥിയെ റിസപ്ഷനിസ്റ്റ് ആദ്യം അഭിവാദ്യം ചെയ്തു. എന്നാൽ അഭിമുഖത്തിന് എത്തിയ ആൾ റിസപ്ഷനിസ്റ്റിനെ നോക്കിയതല്ലാതെ സംസാരിക്കാൻ താൽപര്യം കാട്ടിയില്ല.

തുടർന്ന് റിസപ്ഷനിസ്റ്റായി വേഷമിട്ട മാനേജർ അയാളെ കോൺഫറൻസ് റൂമിലേക്ക് കൊണ്ടു പോയി. റിസപ്ഷനിസ്റ്റിനോടുള്ള പെരുമാറ്റം ശരിയായില്ലെന്നും മറ്റുള്ളവരെ ബഹുമാനിക്കാൻ അറിയാത്തവർക്ക് ജോലി നൽകാൻ താൽപര്യമില്ലെന്നും ഇന്റർവ്യൂ ബോർഡ് ഉദ്യോഗാർഥിയെ അറിയിച്ചു. ഇതോടെ അഭിമുഖം വളരെ വേഗം അവസാനിക്കുകയും ചെയ്തു.

ജോലി തേടിയെത്തുമ്പോൾ എല്ലാവരോടും മാന്യമായി പെരുമാറേണ്ടത് പ്രധാനമാണെന്ന് വ്യക്തമാക്കിയാണ് റെഡ്ഡിറ്റർ ഈ പോസ്റ്റ് അവസാനിപ്പിക്കുന്നത്.