വിവാഹം കഴിക്കാൻ വിസമ്മതിച്ചു; യുവാവിനെ കാമുകി കുത്തിക്കൊലപ്പെടുത്തി

ആന്ധ്രാപ്രദേശ്: യുവാവിനെ കാമുകി കുത്തിക്കൊലപ്പെടുത്തി. വിവാഹം ചെയ്യാൻ വിസമ്മതിച്ചതും മറ്റാരെയോ യുവാവ് പ്രണയിക്കുന്നുവെന്ന സംശയവുമാണ് കൊലപാതകത്തിന് പിന്നിലെന്നാണ്  പൊലീസ് പറയുന്നത്.

ആന്ധ്രാപ്രദേശിലെ പടിഞ്ഞാറൻ ഗോദാവരി ജില്ലയിലെ കപവാരത്തിലാണ് കൊലപാതകം നടന്നത്. അമ്പാട്ടി കരുണ താതാജി നായിഡു (25) ആണ് കൊല്ലപ്പെട്ടത്. സംഭവവുമായി ബന്ധപ്പെട്ട് കാമുകിയെ പൊലീസ് തിരയുകയാണ്.

യുവാവും 22 കാരിയായ പാവനിയും രണ്ടുവർഷമായി പ്രണയത്തിലായിരുന്നുവെന്ന് പൊലീസ് പറയുന്നു. പലതവണ വിവാഹം കഴിക്കണമെന്ന് ആവശ്യപ്പെട്ടിട്ടും യുവാവ് ഒഴിഞ്ഞുമാറിയതാണ് യുവതിയെ ക്രൂര കൃത്യത്തിന് പ്രേരിപ്പിച്ചത്.

തിങ്കളാഴ്ച താതാജിയും പാവനിയും പങ്ങിടിയിൽ വെച്ച് പരസ്പരം കാണുകയും സംസാരിക്കുകയും ചെയ്തു. തുടർന്ന് സന്ധ്യയോടെ ഇരുവരും ബൈക്കിൽ ഗ്രാമത്തിലേക്ക് മടങ്ങി. ഇതിനിടെ പുറകിലിരുന്ന പാവനി ബാഗിൽ നിന്ന് കത്തിയെടുത്ത് ബൈക്ക് ഓടിക്കുകയായിരുന്ന താതാജിയെ പുറകിൽ കുത്തി.

കുത്തേറ്റ് താതാജിയും ബൈക്കും താഴെ വീണു. ഇതോടെ പാവനി കഴുത്തിലും തലയിലും കുത്തി. രക്തംവാർന്ന് യുവാവ് മരിച്ചെന്ന് ഉറപ്പായതോടെ യുവതി അവിടെ നിന്നു കടന്നു. നാട്ടുകാർ വിവരം അറിയിച്ചതിനെ തുടർന്ന് പൊലീസ് സ്ഥലത്തെത്തി അന്വേഷണം തുടങ്ങി.