സിനിമാസ്റ്റെലിൽ പൊലീസിന്റെ കഞ്ചാവ് വേട്ട; 10 കിലോ കഞ്ചാവ് പിടിച്ചെടുത്തു, കാരാട്ട് നൗഷാദും കൂട്ടാളിയും പിടിയിൽ

കാസർഗോഡ്: കാറില്‍ കഞ്ചാവ് കടത്തുന്നതിനിടെ കുപ്രസിദ്ധ കുറ്റവാളി കാരാട്ട് നൗഷാദും കൂട്ടാളിയും തളങ്കര സ്വദേശിയുമായ ഷംസുദീനും നീലേശ്വരം പള്ളിക്കരയിൽ പിടിയില്‍. വാഹനപരിശോധനയ്ക്കിടെ ചീമേനി പൊലീസ് കൈകാണിച്ചിട്ടും നിർത്താതെ ചെറുവത്തൂർ ഭാഗത്തേക്കു പോയ കാറിനെ ചീമേനി സി.ഐ പിഎ അനിൽകുമാറിന്റെ നേതൃത്വത്തിൽ പിന്തുടരുകയായിരുന്നു.

ഇതിനിടെ മറ്റു സ്റ്റേഷനുകളിലേക്കും വിവരം നൽകിയിരുന്നു. ചന്തേര, നീലേശ്വരം ഹൈവേ പൊലീസ് എന്നിവർ ചേർന്ന് നീലേശ്വരം പള്ളിക്കരയിൽ വച്ചാണ് പ്രതികള പിടികൂടിയത്.

കാറിൽ നിന്ന് രണ്ടുപേർ ഇറങ്ങി ഓടിയെങ്കിലും ചെമ്മാക്കരയിൽ വച്ച് നാട്ടുകാരും പൊലീസും ചേർന്ന് പിടികൂടി. പളളിക്കര മേൽപാല നിർമാണം നടക്കുന്ന വഴി നീലേശ്വരം ആശുപത്രി പരിസത്ത് എത്താവുന്ന റോഡിലേക്കു കാറ് വെട്ടിച്ചപ്പോഴാണ് കഞ്ചാവ് സംഘം പൊലീസിന്റെ പിടിയിലായത്.

കാറിൽനിന്ന് പത്തുകിലോ കഞ്ചാവ് പിടികൂടി. ഇന്ന് ഉച്ചയ്ക്ക് രണ്ടു മണിയോടെയാണ് സംഭവം. സെപ്തംബർ 22ന് കാഞ്ഞങ്ങാട് നായബസാറിലുള്ള ബാർബർ ഷോപ്പ് തല്ലിത്തകർത്ത കേസിൽ അറസ്റ്റിലായ കാരാട്ട് നൗഷാദ് കഴിഞ്ഞ ദിവസമാണ് ജയിലിൽ നിന്ന് ഇറങ്ങിയത്.