മലപ്പുറം കോട്ടയ്ക്കലിൽ പന്ത്രണ്ടുകാരിയ്ക്ക് ലൈംഗികചൂഷണം; 1000 രൂപ വീതം നൽകി പീഡിപ്പിച്ചത് പത്തിലേറെ പേർ

മലപ്പുറം: കോട്ടക്കൽ എടരിക്കോട് പന്ത്രണ്ട് വയസുകാരിക്ക് നേരെ ക്രൂര ലൈംഗിക പീഡനം. ആസാമിൽ നിന്നെത്തിച്ച പെൺകുട്ടിയെ അന്യ സംസ്ഥാനക്കാർ ആയ ഒരു സ്ത്രീയും പുരുഷനും ചേർന്ന് പലർക്കായി കാഴ്ചവച്ചു.

ആസാം സ്വദേശികളായ ഈ സ്ത്രീയും പുരുഷനും ചേർന്ന് ഒരാഴ്ച മുൻപ് ആണ് പെൺകുട്ടിയെ കേരളത്തിൽ എത്തിച്ചത്.

അന്ന് മുതൽ നിരവധി പേര് ഇവർ താമസിച്ചിരുന്ന എടരിക്കോട് ഉള്ള വാടക ക്വാർട്ടേഴ്സിലേക്ക് വരുന്നതായി പ്രദേശവാസികളുടെ ശ്രദ്ധയിൽ പെട്ടിരുന്നു. ഇവർ ആണ് ചൈൽഡ് ലൈനിനെ വിവരം അറിയിച്ചത് .

കുട്ടിയെ 1000 രൂപയ്ക്ക് പലർക്കായി കാഴ്ചവെച്ചതായാണ് പൊലീസിന് ലഭിച്ച വിവരം. ചൈൽഡ് ലൈൻ പ്രവർത്തകർ ഇടപെട്ട് പെൺകുട്ടിയെ സംരക്ഷണ കേന്ദ്രത്തിലേക്ക് മാറ്റി.

ഈ കുറഞ്ഞ ദിവസംകൊണ്ട് തന്നെ പത്തിലേറെ പേര് പെൺകുട്ടിയെ ലൈംഗികമായി ചൂഷണം ചെയ്തു എന്നാണ് സൂചന.

പെൺകുട്ടിയിൽ നിന്നും 4000 ലധികം രൂപയും മൊബൈൽ ഫോണും കണ്ടെടുത്തു.

ചൈൽഡ് ലൈൻ നൽകിയ വിവര പ്രകാരം കേസിൽ പോലീസ് അന്വേഷണം തുടങ്ങിയെങ്കിലും ദ്വിഭാഷിയെ ലഭിക്കാത്തത് മൊഴിയെടുക്കലിന് തടസ്സമായി.

4 മാസം മുൻപാണ് സ്ത്രീയും പുരുഷനും എടരിക്കോട് എത്തിയത്. ഇവർക്ക് ക്വാർട്ടേഴ്സ് വാടകക്ക് കൊടുത്ത എടരിക്കോട് സ്വദേശിയുടെ അറിവോടെ ആണ് കാര്യങ്ങൾ നടന്നത് എന്നും ഇയാളും കുട്ടിയെ ലൈംഗികമായി പീഡിപ്പിച്ചു എന്നുമാണ് വിവരം.

പണം കൊടുത്ത് കുട്ടിയെ ലൈംഗിക ചൂഷണത്തിന് ഇരയാക്കിയവരുടെ വിവരങ്ങളും പൊലീസ് ശേഖരിക്കുകകയാണ്.

ഇതിൽ മലയാളികളും അന്യസംസ്ഥാന ക്കാരും ഉൾപ്പെട്ടു എന്നാണ് അധികൃതർ നൽകുന്ന സൂചന.