‍‍'എന്റെ ഇംഗ്ലീഷ് കേട്ട് പലരും ചോദിക്കുന്നു വിദേശത്താണോ പഠിച്ചതെന്ന്'; ഭാഷാ പ്രാവീണ്യത്തെ കുറിച്ച് ഐശ്വര്യ റായ്

മുൻ ലോക സുന്ദരിയും നടിയുമായ ഐശ്വര്യ റായ് ബച്ചൻ 2005-ൽ വിദേശ മാധ്യമ പ്രവർത്തകയ്ക്ക് നൽകിയ അഭിമുഖം സമൂഹമാധ്യമങ്ങളിൽ വൈറലാകുന്നു.

ഇന്ത്യക്കാരെ കുറിച്ചും ഇന്ത്യൻ സംസ്കാരത്തെ കുറിച്ചും വിദേശികൾക്കിടയിലുള്ള ധാരണകളെല്ലാം പൊളിച്ചെഴുതുന്നതാണ് ഐശ്വര്യയുടെ ഈ അഭിമുഖം.

അമേരിക്കൻ ടെലിവിഷൻ അവതാരകയായും നടിയുമായ ഓപ്ര വിൻഫ്രെയ്ക്ക് നൽകിയ അഭിമുഖമാണ് സമൂഹമാധ്യമങ്ങളിൽ ഇപ്പോൾ പ്രചരിക്കുന്നത്.

"ഞാൻ ഇം​ഗ്ലീഷ് സംസാരിക്കുന്നത് കാണുമ്പോൾ പലരും ചോദിച്ചിട്ടുണ്ട്. വിദേശത്താണോ നിങ്ങൾ പഠിച്ചതെന്ന്. ഇന്ത്യയിൽ ഇം​​ഗ്ലീഷ് പഠിക്കാറില്ലെന്നാണ് പലരുടെയും ധാരണ. അത് തെറ്റാണ്"- ഐശ്വര്യ പറയുന്നു.

ഇന്ത്യയിൽ ആളുകൾ പരസ്യമായി ചുംബിക്കാറുണ്ടോ എന്ന ചോദ്യത്തിന് സ്വകാര്യമായാണ് അത് ചെയ്യുന്നതെന്നായിരുന്നു ഐശ്വര്യയുടെ മറുപടി.

കുടുംബബന്ധങ്ങൾ ഇന്ത്യയിൽ വ്യത്യസ്തമാണ്. മാതാപിതാക്കൾക്കൊപ്പം താമസിക്കുക എന്നത് വ്യത്യസ്തമായൊരു അനുഭവമാണെന്നും ഐശ്വര്യ പറയുന്നുണ്ട്.

ഇന്ത്യയിൽ മാതാപിതാക്കൾ നിശ്ചയിക്കുന്ന വിവാഹങ്ങൾ സാധാരണമാണ്. മാതാപിതാക്കൾ പരസ്പരം കണ്ട് സംസാരിക്കും, കുടുംബങ്ങൾ തമ്മിൽ ചേരുമെന്ന് തോന്നിയാൽ വിവാഹത്തിലേക്ക് കടക്കും. അതിൽ ചിലത് വിജയിക്കും ചിലത് പരാജയപ്പെടുമെന്നും മുൻലോകസുന്ദരി പറയുന്നു.