ബിഗ് ബോസിൽ നിന്ന് പുറത്തായ രജിത് കുമാര്‍ കേരളത്തിൽ; വിമാനത്താവളത്തിൽ വൻ വരവേൽപ്പ്; സുരക്ഷാവീഴ്ചയെന്ന് ആക്ഷപം

ബിഗ് ബോസ് മലയാളം സീസണ്‍ രണ്ടില്‍ കഴിഞ്ഞ ദിവസം പുറത്തായ രജിത് കുമാര്‍ കേരളത്തിലെത്തി.

കൊച്ചി വിമാനത്താവളത്തില്‍ രാത്രി ഒന്‍പത് മണിയോടെയാണ് ചെന്നൈയില്‍ നിന്നുള്ള വിമാനത്തില്‍ രജിത് എത്തിയത്.

ബിഗ് ബോസിലെ തങ്ങളുടെ പ്രിയതാരം എത്തുന്നതറിഞ്ഞ് മണിക്കൂറുകള്‍ക്ക് മുന്‍പേ വിമാനത്താവളത്തില്‍ ആരാധകര്‍ എത്തിത്തുടങ്ങിയിരുന്നു.

രജിത് പുറത്തേക്കിറങ്ങുന്ന സമയമായതോടെ വിമാനത്താവള പരിസരം ആള്‍ക്കൂട്ടം കൊണ്ട് നിറഞ്ഞു. ആരാധകരെ നിയന്ത്രിക്കാന്‍ അധികൃതരും പൊലീസും ഏറെ ബുദ്ധിമുട്ടി.

അതേസമയം കൊവിഡ് 19 മുന്‍കരുതലുകള്‍ വകവെക്കാതെ വിമാനത്താവളം പോലെ ഒരു സ്ഥലത്ത് ഇത്രയധികം ആളുകള്‍ ഒരുമിച്ച് കൂടിയതിനെതിരേ സോഷ്യല്‍ മീഡിയയില്‍ വ്യാപക വിമര്‍ശനം ആരംഭിച്ചിട്ടുണ്ട്.

ശനിയാഴ്ചത്തെ എപ്പിസോഡിലാണ് രജിത് കുമാര്‍ ബിഗ് ബോസില്‍ നിന്ന് പുറത്താക്കപ്പെടുന്നത്.

സഹമത്സരാര്‍ഥിയായ രേഷ്മയുടെ കണ്ണില്‍ മുളക് തേച്ചതിനാണ് രജിത്തിനെ ബിഗ് ബോസ് ഷോയില്‍നിന്ന് പുറത്താക്കിയത്.