പല സിനിമകളിലെ കഥാപാത്രങ്ങൾ ഒന്നിച്ചെത്തുമോ? KGF 3 ചിത്രീകരണം ഈ വർഷം ആരംഭിക്കുമെന്ന് നിർമാതാവ്

കെജിഎഫ് 2 (KGF 2)ഉണ്ടാക്കിയ ഓളം ഇനിയും അവസാനിച്ചിട്ടില്ല. 2022 ലെ ഏറ്റവും വലിയ ഇന്ത്യൻ സിനിമ ഏതെന്ന ചോദ്യത്തിന് മറ്റൊരു ഉത്തരവുമില്ല. ഇതിനിടയിലാണ് പ്രേക്ഷകർക്ക് ആവേശമുണ്ടാക്കുന്ന പ്രഖ്യാപനവും വരുന്നത്.

കെജിഎഫ് മൂന്നാം ഭാഗത്തിന്റെ ചിത്രീകരണം ഈ വർഷം ആരംഭിക്കും. ചിത്രത്തിന്റെ നിർമാതാവ് വിജയ് കിർഗുണ്ടൂർ തന്നെയാണ് വാർത്ത അറിയിച്ചിരിക്കുന്നത്.

ഏഫ്രിൽ 14 നാണ് കെജിഎഫ് രണ്ടാം ഭാഗം പുറത്തിറങ്ങിയത്. റിലീസ് ചെയ്ത ദിവസം മുതൽ റെക്കോർഡുകൾ ഭേദിച്ച് മുന്നേറുന്നതിനിടയിലാണ് ചിത്രത്തിന്റെ മൂന്നാം ഭാഗം പ്രഖ്യാപിച്ചിരിക്കുന്നത്.

ചിത്രത്തിന്റെ മൂന്നാം ഭാഗം വരുന്നു എന്നത് മത്രമല്ല വിശേഷം, ആരാധകരെ ആവേശത്തിലാക്കുന്ന മറ്റു ചില വിവരങ്ങൾ കൂടി നിർമാതാവ് പ്രഖ്യാപിച്ചിട്ടുണ്ട്. ഇന്ത്യൻ സിനിമയിൽ ഇതുവരെ കണ്ടിട്ടില്ലാത്ത തരത്തിലുള്ള മേക്കിങ് ആയിരിക്കും ചാപ്റ്റർ 3 ൽ ഉണ്ടാകുക.

മാർവെൽ സ്റ്റൈൽ സിനിമയാണ് വിജയ് കിർഗുണ്ടൂറിന്റെ ഉടമസ്ഥതയിലുള്ള ഹോമബിൾ ഫിലിംസ് പദ്ധതിയിടുന്നത്. ഒരു അഭിമുഖത്തിലാണ് നിർമാതാവ് ഇക്കാര്യങ്ങൾ വ്യക്തമാക്കിയത്.‌ മൂന്നാം ഭാഗത്തിൽ പുതുതായി ഏതെങ്കിലും താരങ്ങൾ എത്തുമോ എന്ന ചോദ്യത്തിനായിരുന്നു നിർമാതാവിന്റെ മറുപടി.

ദൈനിക് ഭാസ്കറിന് നൽകിയ അഭിമുഖത്തിൽ വിജയ് പറഞ്ഞ മറുപടി ഇങ്ങനെ, മാർവെൽ ചിത്രങ്ങൾ പോലൊന്നാണ് തങ്ങൾ പദ്ധതിയിടുന്നത്. പല സിനിമകളിലെ കഥാപാത്രങ്ങളെ ഒന്നിച്ചു കൊണ്ടുവന്ന് ഡോക്ടർ സ്ട്രെയിഞ്ച് പോലെയോ സ്പൈഡർമാൻ ഹോം കമിംഗ് പോലെയോ ഉള്ള ചിത്രമാണ് ഉദ്ദേശിക്കുന്നത്.

അത്തരമൊരു പരീക്ഷണത്തിലൂട ചിത്രം കൂടുതൽ പ്രേക്ഷകരിലേക്ക് എത്തുമെന്നാണ് പ്രതീക്ഷിക്കുന്നതെന്നും നിർമാതാവ്. അതേസമയം, ഈ വർഷം എന്നു മുതൽ കെജിഎഫ് 3 ന്റെ ചിത്രീകരണം ആരംഭിക്കുമെന്ന ചോദ്യത്തിനും അദ്ദേഹം മറുപടി നൽകി.

നിലവിൽ പ്രഭാസിനെ നായകനാക്കി സലാർ എന്ന ചിത്രത്തിന്റെ തിരക്കിലാണ് സംവിധായകൻ പ്രശാന്ത് നീൽ. ചിത്രത്തിന്റെ 30-35 ശതമാനം ചിത്രീകരണം പൂർത്തിയാക്കി. ഒക്ടോബർ-നവംബർ മാസത്തോടെ സലാറിന്റെ ചിത്രീകരണം പൂർത്തിയാക്കുമെന്നാണ് പ്രതീക്ഷിക്കുന്നത്.

ഇതിനു ശേഷമായിരിക്കും പ്രശാന്ത് നീൽ കെജിഎഫ് 3 നായി തയ്യാറെടുക്കുക. ഈ വർഷം ഒക്ടോബറിൽ കെജിഎഫ് 3 ചിത്രീകരണം ആരംഭിച്ചേക്കാം. 2024 ൽ ചിത്രം റിലീസ് ചെയ്യാനാകുമെന്നാണ് പ്രതീക്ഷിക്കുന്നതെന്നും നിർമാതാവ് പറഞ്ഞു.