Vijay Deverakonda| അപൂർവ നേട്ടം; നടൻ വിജയ് ദേവരക്കൊണ്ടയ്ക്ക് ഇൻസ്റ്റാഗ്രാമിൽ 90 ലക്ഷം ഫോളോവേഴ്സ്

അർജുൻ റെഡ്ഡി എന്ന സിനിമയിലൂടെ തെന്നിന്ത്യൻ പ്രേക്ഷകരുടെ പ്രിയനടനായി മാറിയ താരമാണ് വിജയ് ദേവരക്കൊണ്ട. തെലുങ്കിലും തമിഴിലും മലയാളത്തിലും കുറഞ്ഞ കാലയളവിൽ ഒട്ടേറെ ആരാധകരെ സ്വന്തമാക്കിയ താരം കൂടിയാണ്.

തെലുങ്ക് സിനിമാ രംഗത്ത് ചുവടുറപ്പിക്കാൻ പരിശ്രമിക്കുന്ന ഒട്ടേറെ യുവതാരങ്ങളുണ്ട്. എന്നാൽ, കുറച്ചുസിനിമകൾ കൊണ്ടുതന്നെ സ്വന്തമായി ഒരിടം കണ്ടെത്താൻ വിജയ് ദേവരക്കൊണ്ടയ്ക്ക് കഴിഞ്ഞു. പെല്ലി ചൂപ്പുലു, അർജുൻ റെഡ്ഡി, ഗീതാ ഗോവിന്ദം എന്നീ സിനിമകളാണ് താരത്തെ മറ്റൊരുതലത്തിലേക്ക് ഉയർത്തിയത്.

വിജയ് ദേവരക്കൊണ്ടയുടെ അഭിനയ രീതികളും നിലപാടുകളും യുവാക്കളെ ഏറെ ആകർഷിക്കുന്നു. അതുകൊണ്ടുതന്നെ വിജയ് ദേവരക്കൊണ്ട എന്ന പേര് അവർ മന്ത്രം പോലെ ഉരുവിടുന്നതും. സോഷ്യൽ മീഡിയയിലും വിജയ് ദേവരക്കൊണ്ടക്ക് പിന്നിൽ അണിനിരക്കുന്ന യുവാക്കളുടെ എണ്ണം നാൾക്കുനാൾ വർധിച്ചുവരികയാണ്.

അതുകൊണ്ടുതന്നെയാണ് സെൻസേഷണൽ സ്റ്റാറായി അദ്ദേഹം മാറിയത്. വിജയ് ദേവരക്കൊണ്ടയ്ക്ക് സോഷ്യൽ മീഡിയയിൽ ലഭിക്കുന്ന ആരാധകരുടെ എണ്ണം കണ്ടാൽ പല പ്രമുഖ താരങ്ങളുടെയും കണ്ണുതള്ളും.

പരാജയങ്ങൾ വന്നാലും വിജയ് ദേവരക്കൊണ്ടയുടെ ഇമേജിനെ ഒരുതരത്തിലും ബാധിക്കില്ല. ഇപ്പോള്‍ അത്ര സെലക്ടീവായാണ് സിനിമകൾ ചെയ്യുന്നത്. ദീർഘകാലം യുവ സംവിധായകർക്ക് വേണ്ടിയാരുന്നു അഭിനയിച്ചതെങ്കിൽ, ഇപ്പോൾ സൂപ്പർ ഡയറക്ടർമാർ അദ്ദേഹത്തെ നോട്ടമിട്ടിരിക്കുകയാണ്.

ഇപ്പോൾ ഇതാ മറ്റൊരു അപൂർവ നേട്ടം കൂടി താരം സ്വന്തമാക്കിയിരിക്കുകയാണ്. ഇൻസ്റ്റാഗ്രാമിൽ ചരിത്രം രചിച്ചിരിക്കുകയാണ് വിജയ് ദേവരക്കൊണ്ട.

90 ലക്ഷം ഫോളോവേഴ്സാണ് ഇൻസ്റ്റാഗ്രാമിൽ വിജയ് ദേവരക്കൊണ്ടയ്ക്ക് ഉള്ളത്. തെന്നിന്ത്യൻ സിനിമയിൽ ഇത്രയേറെ ഫോളോവേഴ്സുള്ള ഏകതാരമായിരിക്കുകയാണ് അദ്ദേഹം. ഇത് അത്ര എളുപ്പം സ്വന്തമാക്കാൻ കഴിയുന്ന നേട്ടമല്ലെന്ന് അറിയുക.

വിജയ് ദേവരക്കൊണ്ടയെക്കാൾ വലിയ താരങ്ങൾ ഏറെയുണ്ട് തെലുങ്കിൽ. എന്നാൽ കഴിഞ്ഞ രണ്ട് വർഷത്തിനിടെ ഇത്രയേറെ ആരാധകരെ സ്വന്തമാക്കിയ താരം വേറെയില്ല.

2018 മാർച്ച് ഏഴിനാണ് വിജയ് ദേവരക്കൊണ്ട ഇൻസ്റ്റാഗ്രാമിൽ അക്കൗണ്ട് തുറന്നത്. രണ്ട് വർഷം കൊണ്ടുതന്നെ 90 ലക്ഷം എന്ന മാജിക് സംഖ്യയിലേക്ക് ഫോളോവേഴ്സിന്റെ എണ്ണം എത്തി നിൽക്കുകയാണ്.

പുരി ജഗന്നാഥിന്റെ സംവിധാനത്തിൽ ഒരു ആക്ഷൻ സിനിമയിലാണ് താരം ഇപ്പോൾ അഭനയിക്കുന്നത്. ശിവ നിർവാണ സംവിധാനം ചെയ്യുന്ന ചിത്രത്തിന്റെ പ്രഖ്യാപനവും അടുത്തിടെ നടന്നു. ഇതിന് പിന്നാലെ സംവിധായകൻ സുകുമാറും വിജയിനെ നായകനാക്കി സിനിമ ഒരുക്കാൻ തയാറെടുക്കുകയാണ്.

ബോളിവു‍ഡിലേക്ക് ചുവടുവയ്ക്കാനൊരുങ്ങുകയാണ് താരം. ബലാക്കോട്ട് വ്യോമാക്രമണം പ്രമേയമാക്കുന്ന സിനിമയിൽ വ്യോമസേനാ എയർവിങ് കമാൻഡർ അഭിന്ദൻ വർത്തമാന്റെ വേഷത്തിൽ വിജയ് ദേവരക്കൊണ്ട എത്തുമെന്നാണ് റിപ്പോർട്ടുകൾ.