അരക്കോടിയുടെ റോളക്സ് വാച്ച് കടലിൽപോയി; അരമണിക്കൂറിനുള്ളിൽ ദുബായ് പൊലീസ് മുങ്ങിയെടുത്തു

ദുബായ്: കടലിൽ വീണ അരക്കോടി രൂപ വില വരുന്ന ആഡംബര വാച്ച് ദുബായ് പൊലീസ് മുങ്ങിയെടുത്തു. പാം ജുമൈറയില്‍ ഉല്ലാസ ബോട്ടില്‍ യാത്ര ചെയ്ത യു.എ.ഇ പൗരന്റെ റോളക്സ് ബ്രാൻഡിലുള്ള വാച്ചാണ് കടലില്‍ വീണത്.

കടലിൽ വീണ വാച്ചിന് ഏകദേശം അരക്കോടിയിലേറെ രൂപ (250,000 ദിര്‍ഹം) വില വരും. ദുബായ് പോലീസിന്റെ പ്രത്യേക മുങ്ങല്‍ വിദഗ്ധ സംഘമാണ് കടലിൽനിന്ന് ആഡംബര വാച്ച് തപ്പിയെടുത്തത്

ഹമീദ് ഫഹദ് അലമേരി എന്നയാളുടെ വാച്ചാണ് അബദ്ധത്തിൽ കടലിൽ വീണത്. ഇദ്ദേഹം സുഹൃത്തുക്കൾക്കൊപ്പം ദുബായിലെ പാം ജുമൈറയില്‍നിന്ന് ഉല്ലാസബോട്ടില്‍ യാത്ര ചെയ്യുമ്പോഴാണ് വിലപിടിപ്പുള്ള റോളക്‌സ് വാച്ച് കടലില്‍ വീണത്.

ഏറ്റവും ആഴമുള്ള സ്ഥലത്ത് വെച്ച് വാച്ച് നഷ്ടമായതോടെ അത് തിരികെ ലഭിക്കുമെന്ന പ്രതീക്, ഹമീദ് ഫഹദിന് ഇല്ലായിരുന്നു. എന്നാൽ പ്രതീക്ഷ കൈവിടാതെ ഹമീദ് ഫഹദ് ഉടന്‍ തന്നെ ദുബായ് പോലീസില്‍ വിവരമറിയിച്ചു.

അര മണിക്കൂറിനകം ദുബായ് പോലീസിന്റെ മുങ്ങല്‍ വിദഗ്ധരുടെ സംഘം സ്ഥലത്തെത്തി. 30 മിനിറ്റിനുള്ളില്‍ അവര്‍ അത് കടലിനടിയിൽനിന്ന് കണ്ടെത്തുകയും മുങ്ങിയെടുക്കുകയും ചെയ്തു. വാച്ചുമായി എത്തിയ പോലീസ് സംഘത്തെ നിറഞ്ഞ കൈയടിയോടെയാണ് ഹമീദും കൂട്ടുകാരും ചേർന്ന് വരവേറ്റത്.