യാത്രയ്ക്കിടെ പബ്ജി കളിയിൽ മുഴുകി; കുടിവെള്ളമെന്നു കരുതി രാസലായനി കുടിച്ച യുവാവിന് ദാരുണാന്ത്യം

പജ്ബി കളിക്കിടെ, വെള്ളമാണെന്നു കരുതി യുവാവ് കുടിച്ചത് ജൂവലറി ആവശ്യത്തിന് ഉപയോഗിക്കുന്ന രാസലായനി. രാസലായനി കുടിച്ച് മധ്യപ്രദേശുകാരനായ സൗരഭ് യാദവ് എന്ന യുവാവിനാണ് ദാരുണാന്ത്യമുണ്ടായത്.

സ്വര്‍ണവ്യാപാരിയായ സുഹൃത്തിനൊപ്പം ഡല്‍ഹിയില്‍ നിന്നും ആഗ്രയിലേക്ക് യാത്ര ചെയ്യുകയായിരുന്നു യുവാവ്. ഇരുവരും ഒരു ബാഗിലാണ് സാധനങ്ങൾ സൂക്ഷിച്ചിരുന്നത്.

സ്വര്‍ണ്ണം മിനുക്കാനുപയോഗിക്കുന്ന ലായനിയും കുടിവെളളവും ഒരേ ബാഗിലാണ് വച്ചത്.

ട്രെയിൽ കയറിയയുടൻ പബ്ജി കളിയിൽ മുഴുകിയ സൗരഭ് വെള്ളമാണെന്നു കരുതി രാസലായനി കുടിക്കുകയായിരുന്നെന്ന് ഒപ്പമുണ്ടായിരുന്ന സുഹൃത്ത് സന്തോഷ് ശർമ്മ പറഞ്ഞതായി ദേശീയ മാധ്യമങ്ങൾ റിപ്പോർട്ട് ചെയ്യുന്നു.

ഇക്കാര്യം ആഗ്ര കന്റോൺമെന്റ് ഗവൺമെന്റ് റെയിൽ‌വേ പോലീസും (ജി‌ആർ‌പി) സ്ഥിരീകരിച്ചിട്ടുണ്ട്. രാസലായനി കുടിച്ച് അല്‍പസമയത്തിനകം സൗരഭ് കുഴഞ്ഞുവീണു. അടുത്ത റെയില്‍വേ സ്റ്റേഷനില്‍ എത്തിയപ്പോഴേക്കും മരിച്ചിരുന്നു.