കിണറ്റിൽ വീണ നായയെ ദിവസങ്ങൾക്കുശേഷം രക്ഷപ്പെടുത്തി ; ഭക്ഷണം കഴിക്കാതെ നായ ജീവൻ നിലനിർത്തിയത് അത്ഭുതകരമായി

ദിവസങ്ങൾ കിണറ്റിൻ കുടുങ്ങി കിടന്ന നായയെ രക്ഷപ്പെടുത്തി ഫയർ ഫോഴ്സ് സിവിൽ ഡിഫൻസ് അംഗങ്ങൾ. മലപ്പുറം നിലമ്പൂർ ചുങ്കത്തറ പഞ്ചായത്തിലെ  കളംകുന്ന് പ്രദേശത്ത് കോട്ടക്കകത്ത് ജിനു ജോസഫിൻ്റ ഉടമസ്ഥയിലുള്ള പറമ്പിലെ കിണറ്റിലാണ് നായ അകപ്പെട്ടത്.

ഉപയോഗശൂന്യവും ആൾമറയില്ലാത്തതും ആയ കിണറ്റിൽ വീണ നായ സമീപത്തുള്ള തോട്ടത്തിലേതാണ്.  ആഴ്ചകൾക്ക് മുമ്പാണ് നായയെ കാണാതായത് എന്ന് പ്രദേശവാസികൾ പറയുന്നു.

നായയുടെ രോദനം കേട്ട സമീപവാസികൾ പല പ്രാവശ്യം കിണറിനു സമീപത്തെത്തിയെങ്കിലും, കിണറിൻ്റെ വക്കിൽ കയറിക്കിടന്ന നായയെ കണ്ടെത്താൻ സാധിച്ചില്ല.

നിലമ്പൂർ ഫയർ ആൻഡ് റെസ്ക്യു സ്റ്റേഷനിലെ അസിസ്റ്റൻ്റ് സ്റ്റേഷൻ ഓഫീസർ ഒ.കെ. അശോകൻ്റെ നിർദ്ദേശപ്രകാരം ഫയർ സ്റ്റേഷന് കീഴിൽ പ്രവർത്തിക്കുന്ന സിവിൽ ഡിഫൻസ് അംഗങ്ങളെത്തിയാണ് നായയെ പുറത്തെടുത്തത്.

ഇത്രയും ദിവസം നായ എങ്ങനെ ഭക്ഷണം കിട്ടാതെ ജീവൻ നില നിർത്തി എന്നത് ആണ് അത്ഭുതം. പുറത്തെടുത്തുവെങ്കിലും നായയുടെ സ്ഥിതി വളരെ മോശമാണ്.

സിവിൽ ഡിഫൻസ് അംഗങ്ങളായ അംഗങ്ങളായ ബിബിൻ പോൾ, ഷംസുദ്ദീൻ കൊളക്കാടൻ, ശഹബാൻ മമ്പാട്, പ്രകാശൻ.കെ, അബദുൽ മജീദ്, സഫീർ മാനു, ഉണ്ണിരാജൻ, നജുമുദ്ദീൻ.ടി, ആഷിഖ്.ടി.പി. എന്നിവർ രക്ഷാപ്രവർത്തനങ്ങൾക്ക് നേതൃത്വം നൽകി.