പത്തനംതിട്ട: ഹാട്രിക്ക് തേടി UDF; പിടിച്ചെടുക്കാൻ LDF; അട്ടിമറിക്കാൻ NDA

ശബരിമല യുവതീപ്രവേശന വിഷയത്തിലുള്ള സുപ്രീംകോടതി വിധിയുടെ പശ്ചാത്തലത്തിൽ ദേശീയ ശ്രദ്ധ ആകർഷിക്കുന്ന മണ്ഡലമാണ് പത്തനംതിട്ട. 2008ലെ മണ്ഡലം പുനഃക്രമീകരണത്തിൽ രൂപീകൃതമായ മണ്ഡലമാണിത്. ക്രൈസ്തവ സഭക്ക് സ്വാധീനമുള്ള മണ്ഡലം. എൻഎസ്എസ്, എസ്എൻഡിപി സംഘടനകൾക്കും വേരോട്ടമുണ്ട്.

യുഡിഎഫിനായി ആന്റോ ആന്റണി വീണ്ടും മത്സരരംഗത്തിറങ്ങിയപ്പോൾ, കഴിഞ്ഞ നിയമസഭാ തെരഞ്ഞെടുപ്പിൽ ആറന്മുളയിൽ അട്ടിമറി വിജയം നേടിയ വീണ ജോർജിനെയാണ് എൽഡിഎഫ് കളത്തിലിറക്കിയത്. നീണ്ട അനിശ്ചിതത്വങ്ങൾക്കൊടുവിൽ കെ സുരേന്ദ്രനെ ബിജെപി സ്ഥാനാർഥിയായി പ്രഖ്യാപിച്ചു.

2009ൽ സിപിഎമ്മിലെ കെ അനന്തഗോപനെ പരാജയപ്പെടുത്തിയാണ് ആന്റോ ആന്റണി ലോക്സഭയിലേക്ക് കന്നി ജയം സ്വന്തമാക്കിയത്. 2014ൽ എൽഡിഎഫ് സ്വതന്ത്ര സ്ഥാനാര്‍ഥി പീലിപ്പോസ് തോമസിനെ ഇറക്കിയെങ്കിലും ആന്റോ ആന്റണി വിജയം ആവർത്തിച്ചു.

കഴിഞ്ഞ രണ്ട് ലോക്സഭാ തെരഞ്ഞെടുപ്പുകളിലെയും കണക്കെടുത്താൽ ബിജെപി ഒഴികെയുള്ള കക്ഷികൾക്കെല്ലാം പത്തനംതിട്ടയിൽ വോട്ടുകുറഞ്ഞു. കോൺഗ്രസിന്റെ വോട്ടുവിഹിതം 51.21 ശതമാനത്തിൽ നിന്ന് 42.07 ശതമാനത്തിലെത്തി. സിപിഎമ്മിന്റെ വോട്ട് വിഹിതം 37.26 ശതമാനത്തിൽ നിന്ന് 35.48 ആയി. അതേസമയം, ബിജെപിയുടേത് 7.06 ശതമാനത്തിൽ നിന്ന് 16.29 ശതമാനമായി ഉയർന്നു.

2009ൽ ബിജെപി സ്ഥാനാർഥി ബി രാധാകൃഷ്ണമോനോൻ നേടിയത് 56,294 വോട്ട്. 2014ൽ എം ടി രമേശ് പിടിച്ചത് 1,38,954 വോട്ട്. 2016ലെ നിയമസഭാ തെരഞ്ഞെടുപ്പിലും ബിജെപി വിഹിതത്തിൽ വർധനവുണ്ടായി. ഏഴു നിയമസഭാ മണ്ഡലങ്ങളിലായി 1,91,576 വോട്ടുകളാണ് ബിജെപി നേടിയത്. ശബരിമല വിഷയം ഇത്തവണ മണ്ഡലത്തിൽ അട്ടിമറി വിജയം സമ്മാനിക്കുമെന്ന പ്രതീക്ഷയിലാണ് ബിജെപി നേതൃത്വം.