പുതുവർഷത്തെ വരവേൽക്കാൻ അനന്തപുരിയിൽ വസന്തങ്ങളുടെയും ദീപങ്ങളുടെയും ഉത്സവം

ക്രിസ്മസ് പുതുവത്സര ആഘോഷങ്ങൾക്ക് നിറപ്പകിട്ടേകി കനകകുന്നിൽ വസന്തോത്സവം തുടങ്ങി. ഡിസംബർ 25-ന് മന്ത്രി പി എ മുഹമ്മദ് റിയാസ് പുഷ്പ മേളയുടെയും ലൈറ്റ് ഷോയുടെയും ഉദ്ഘാടനം നിർവ്വഹിച്ചു. ചടങ്ങിൽ വി കെ പ്രശാന്ത് എം എൽ എ അധ്യക്ഷനായി. മന്ത്രി ജി. ആർ. അനിൽ മുഖ്യാതിഥിയായിരുന്നു. ഐ. ബി. സതീഷ് എം എൽ എ, മേയർ ആര്യ രാജേന്ദ്രൻ തുടങ്ങിയവർ പങ്കെടുത്തു.

കനകകുന്നിൻ്റെ പ്രവേശന കവാടത്തിൽ പ്രത്യേകതരത്തിൽ ഒരുക്കിയ ദീപാലങ്കാരങ്ങൾ ഏവരേയും ആകർഷിക്കുന്നതായിരുന്നു. പടുകൂറ്റൻ ഗ്ലോബ്, പോളാർ ബിയർ, ദിനോസർ തുടങ്ങിയ നിരവധി അലങ്കാരങ്ങൾ കുട്ടികളേയും മുതിർന്നവരേയും ഒരുപോലെ സന്തോഷിപ്പിക്കുന്നവയായിരുന്നു.

കൂടാതെ വിവിധ ഇടങ്ങളിൽ ഒരുക്കിയ സെൽഫി പോയിൻ്റുകൾ ഈ സന്തോഷം ഇരട്ടിപ്പിക്കുന്നു. കുറച്ച് സമയം ആലീസിൻ്റെ മായാലോകത്തിലൂടെ സഞ്ചരിക്കാൻ ഇവിടെ സാധ്യമാണ്.

ക്രിസ്മസ് സീസണിലെ ഒരു യൂറോപ്യൻ സ്ട്രീറ്റിലൂടെയും ഒരു കാൽനട യാത്ര അതിമനോഹരമാക്കി സെറ്റ് ചെയ്തിട്ടുണ്ട്.

ധാരാളം പൂച്ചെടികൾ കൊണ്ട് തീർത്ത മനോഹരമായ ഉദ്യാനം, ബോൺസായിയുടെ ശേഖരം, കട്ട് ഫ്ലവർ ഡിസ്പ്ലേ, ഇതൊക്കെ കണ്ണിന് കൗതുകമേകുന്ന കാഴ്ചകളായിരുന്നു. ട്രേഡ് ഫെയർ, ഫുഡ് കോർട്ട്, അമ്യൂസ്മെൻ്റ് പാർക്ക് തുടങ്ങിയവയും വസന്തോത്സവത്തിൻ്റെ ഭാഗമായി ഒരുക്കിയിട്ടുണ്ട്.

ഭംഗി ആസ്വദിക്കുന്നതിനൊപ്പം നമ്മുടെ വീട്ടിലുള്ള പൂന്തോട്ടം അലങ്കരിക്കാൻ ആവശ്യമായ ചെടികളും, വിത്തുകളും, ചെടിച്ചട്ടികളുമൊക്കെ വാങ്ങാനും സാധിക്കും.

ഔഷധ ചെടികളെ പറ്റി അറിവ് നേടാൻ ഈ മേളയിൽ അവസരമൊരുക്കി. ദശപുഷ്പം മാത്രമല്ല ഓരോരുത്തരുടേയും നാളനുസരിച്ച് ഏത് വൃക്ഷമാണ് വരുത്തതെന്നും മനസ്സിലാക്കി തന്നു. കള്ളിച്ചെടികളുടെയും, ഓർക്കിടുകളുടെയും ശേഖരവും പ്രദർശനത്തിൻ്റെ മാറ്റ് കൂട്ടി.

മേള ജനുവരി 3-ന് സമാപിക്കും. ടിക്കറ്റ് നിരക്ക് 50 രൂപ.