വിദ്യാർത്ഥികളുടെ പിറന്നാളാഘോഷിക്കാൻ ബസിൽ കരിമരുന്ന് പ്രയോഗം; ടൂറിസ്റ്റ് ബസ് പിടിച്ചെടുത്തു

കോഴിക്കോട്: താമരശേരിയിൽനിന്ന് വിനോദയാത്ര പോയ വിദ്യാർത്ഥിസംഘം അപകടം വിളിച്ചുവരുത്തുന്ന രീതിയിൽ പിറന്നാൾ ആഘോഷം നടത്തി. കോരങ്ങാട് സർക്കാർ വോക്കേഷണൽ ഹയർ സെക്കൻഡറി സ്കൂളിൽ നിന്ന് വിനോദയാത്രക്ക് പോയ രണ്ടു ബാച്ചിലെ വിദ്യാർത്ഥികളുടെ ബസിന് മുകളിലാണ് അപകടം ക്ഷണിച്ചുവരുത്തുന്ന ആഘോഷ പരിപാടികൾ അരങ്ങേറിയത്. ബസിന് മുകളിൽ കയറി പടക്കം പൊട്ടിച്ചും പൂത്തിരി കത്തിച്ചുമായിരുന്നു ആഘോഷം. ഇതിന്‍റെ ദൃശ്യങ്ങൾ പുറത്തുവന്നിരുന്നു. 

ഇക്കഴിഞ്ഞ ഡിസംബർ ഒന്നിനാണ് സ്ക്കൂളിൽ നിന്ന് അഞ്ച് ബസുകളിലായി ബാഗ്ലൂരിലേക്ക് വിദ്യാർത്ഥി സംഘം വിനോദയാത്ര പോയത്. അവിടെ വെച്ചാണ് അതിര് കടന്നുള്ള ആഘോഷപരിപാടികൾ അരങ്ങേറിയത്.  ദൃശ്യങ്ങൾ പുറത്ത് വന്നതോടെ മോട്ടോർ വാഹന വകുപ്പ് ബസ് പിടിച്ചെടുക്കുകയായിരുന്നു. 

നിയമ ലംഘനം നടത്തിയ KL -35 D 5858 നമ്പറിലുള്ള കൊടുവള്ളി സ്വദേശിയുടെ ബസ് മോട്ടോർ വാഹന വകുപ്പ് എൻഫോഴ്സ്മെന്റ് വിഭാഗമാണ് ബസ് പിടിച്ചെടുത്തത്. അതേസമയം ബസ് ഉടമകൾ മാത്രമാണ് ബസിന് മുകളിൽ കയറിയതെന്നും, വിദ്യാർത്ഥികൾക്ക് ഇതിൽ പങ്കില്ലെന്ന് സ്കൂൾ അധികൃതർ വ്യക്തമാക്കി.