Onam 2021| ആളും ആരവവുമില്ല, ഓണാഘോഷത്തിന് തുടക്കം; തൃപ്പൂണിത്തുറ അത്തച്ചമയം ചടങ്ങ് മാത്രം

അത്തം പിറന്നു. തിരുവോണത്തിന് ഇനി പത്ത് നാള്‍. ചിങ്ങം പിറക്കാൻ അഞ്ചു നാളുകൾ കൂടിയുണ്ടെങ്കിലും മലയാളികളുടെ ഓണക്കാലത്തിന് തുടക്കമായി. കടുത്ത കോവിഡ് നിയന്ത്രണങ്ങൾക്കിടയിലും മലയാളികൾ ഇന്നു മുതൽ ഓണത്തിരക്കിലേക്ക് കടക്കുന്നു. തൃപ്പുണിത്തുറയില്‍ ഓണപ്പതാക ഉയര്‍ത്തിയതോടെ സംസ്ഥാനത്തെ ഓണാഘോഷ പരിപാടികള്‍ക്ക് തുടക്കമായി.

കോവിഡ് മാനദണ്ഡങ്ങൾ കണക്കിലെടുത്ത് കഴിഞ്ഞ വർഷത്തെപ്പോലെ ഇത്തവണയും തൃപ്പൂണിത്തുറയിൽ അത്തച്ചമയവും ഘോഷയാത്രയുമുണ്ടായില്ല.

കഴിഞ്ഞ മൂന്നുവര്‍ഷങ്ങളിലെപ്പോലെ പതാക ഉയര്‍ത്തല്‍ ചടങ്ങുമാത്രമാണ് തൃപ്പുണിത്തുറയില്‍ ഇത്തവണയുമുണ്ടായിരുന്നത്. മുൻ മന്ത്രി കെ.ബാബു ഓണപ്പതാക ഉയര്‍ത്തി.

ആരവങ്ങളും ആഘോഷങ്ങളുമൊഴിവാക്കേണ്ടിവരുന്നതിലെ വിഷമം നാട്ടുകാര്‍ മറച്ചുവച്ചില്ല. രണ്ടു മഹാപ്രളയങ്ങളും കോവിഡും മൂലമാണ് കഴിഞ്ഞ വർഷങ്ങളിൽ അത്തച്ചമയഘോഷയാത്ര ഒഴിവാക്കിയിരുന്നത്.

ഓണം ഐതിഹ്യത്തോട് ചേര്‍ന്നുനിൽക്കുന്ന തൃക്കാക്കര ക്ഷേത്രത്തിലെ തിരുവോണ ഉത്സവം കൊടിയേറ്റും ഇന്നാണ്.

ഓണത്തിന്റെ വരവറിയിച്ചുള്ള തൃപ്പൂണിത്തുറ അത്തം ഘോഷയാത്ര ഇത്തവണയും മലയാളിയുടെ മനസ്സിൽ മാത്രം.

കോവിഡ് വ്യാപന സാഹചര്യത്തെ തുടർന്ന് അത്തം ഘോഷയാത്ര മാറ്റിവെച്ചെങ്കിലും പതിവ് തെറ്റിക്കാതെ അത്തം നഗറിൽ ഇന്ന്

ഓണം വിളംബരം ചെയ്യുന്ന സാംസ്ക്കാരികോത്സവം കൂടിയായ തൃപ്പൂണിത്തുറ അത്തച്ചമയം ഇത്തവണയും നിറക്കാഴ്ചകളില്ലാതെയാണ് കടന്നു പോവുന്നത്.

മൂന്ന് വർഷം മുൻപുണ്ടായ പ്രളയമായിരുന്നു ഈ ചരിത്രപ്രസിദ്ധ ഘോഷയാത്ര ആദ്യം മുടക്കിയത്.

തൊട്ടടുത്ത വർഷം അത്തച്ചമയമൊരുക്കിയെങ്കിലും പിന്നീട് വന്ന കോവിഡ് മഹാമാരി കഴിഞ്ഞ വർഷത്തെ അത്താഘോഷങ്ങൾക്കും വിലങ്ങിട്ടു.

മഹാവ്യാധിയിൽ നിന്നും കരകയറാത്തതിനാൽ ഇത്തവണയും രാജവീഥി ആഘോഷയാത്രകളില്ലാതെ വിജനമായി.

പതിറ്റാണ്ടുകളായി തൃപ്പൂണിത്തുറ നഗരസഭയാണ് ഈ മതേതര ഉത്സവത്തിൻഖെ സംഘാടനം നിർവ്വഹിക്കുന്നത്.

തൃപ്പൂണിത്തുറ രാജകുടുംബ പ്രതിനിധിയിൽ നിന്ന് നഗര സഭ ചെയർപേഴ്സൺ അത്തപ്പതാക ഏറ്റുവാങ്ങിയിരുന്നു.

ചരിത്രത്തിലാദ്യമായി രാജകുടുംബത്തിലെ ഒരു വനിതാ പ്രതിനിധി, അത്തപ്പതാക നഗരസഭാധ്യക്ഷയ്ക്ക് കൈമാറിയത് ഇത്തവണത്തെ സവിശേഷതയാണ്.

പ്രതിസന്ധികളെയെല്ലാം അതിജീവിച്ച്, വരും വർഷങ്ങളിൽ പൂർണ്ണ പ്രതാപത്തോടെ തൃപ്പൂണിത്തുറ വീണ്ടും അത്തച്ചമയത്തിന് വേദിയാകുമെന്ന പ്രതീക്ഷയിലാണെന്ന് നഗരസഭ ചെയർപേഴ്സൺ രമ സന്തോഷ് പറഞ്ഞു.