കാണിക്കയെണ്ണാൻ പത്തു കോടിയുടെ പദ്ധതി; തിരുപ്പതി ക്ഷേത്രത്തിൽ പുതിയ സംവിധാനം

ആന്ധ്രാപ്രദേശിലെ തിരുപ്പതി വെങ്കിടേശ്വര സ്വാമി ക്ഷേത്രത്തിൽ കാണിക്കയെണ്ണാൻ 10 കോടി രൂപ നിർമ്മാണ ചെലവിൽ പുതിയ സംവിധാനം. ക്ഷേത്രത്തിലെ പ്രധാനപ്പെട്ട സ്ഥലങ്ങളിലൊന്നാണ് പരകമണി (Parakamani) മണ്ഡപം.

ക്ഷേത്രത്തിൽ കാണിയ്ക്കയായി ലഭിക്കുന്നനാണയങ്ങൾ, നോട്ടുകൾ, സ്വർണം, വെള്ളി മുതലായ ആഭരണങ്ങൾ അടക്കമുള്ള വഴിപാടുകൾ എണ്ണുന്ന ഒരു പ്രത്യേക സ്ഥലമാണിത്.

പതിനേഴാം നൂറ്റാണ്ട് മുതൽ ക്ഷേത്രത്തിൽ ഈ പാരമ്പര്യം പിന്തുടരുന്നു എന്നാണ് പറയപ്പെടുന്നത്. ഇപ്പോൾ പുതിയൊരു പരകമണി നിർമിച്ചിരിക്കുകയാണ് തിരുപ്പതി ക്ഷേത്രം. ‌14,962 ചതുരശ്ര അടി വിസ്തീർണത്തിലാണ് വഴിപാടുകൾ എണ്ണാനായുള്ള പുതിയ സ്ഥലം ഒരുക്കിയിരിക്കുന്നത്.

ബാംഗ്ലൂരിൽ നിന്നുള്ള മുരളീകൃഷ്ണ എന്ന ഭക്തനാണ് ഇതിനായി സംഭാവന നൽകിയയത്. പത്തു കോടി രൂപ ചെലവഴിച്ചാണ് പുതിയ പരകമണി ഒരുക്കിയിരിക്കുന്നത്. സിസിടിവി ക്യാമറകൾ ഉൾപ്പെടെയുള്ള ഏറ്റവും പുതിയ സുരക്ഷാ സൗകര്യങ്ങളോടു കൂടിയാണ് നിർമാണം.

ആന്ധ്രാപ്രദേശ് മുഖ്യമന്ത്രി വൈഎസ് ജഗൻ മോഹൻ റെഡ്ഡിയാണ് പുതിയ പരകമണിയുടെ ഉദ്ഘാടനം നിർവഹിച്ചത്. ഫെബ്രുവരി അഞ്ചിന് രാവിലെ മുതൽ പുതിയ സ്ഥലത്തു വെച്ചാണ് വഴിപാടുകൾ എണ്ണിത്തിട്ടപ്പെടുത്തുന്നത്.

കാലങ്ങളായുള്ള ആചാരമനുസരിച്ച്, ഭക്തർ സമർപ്പിക്കുന്ന വഴിപാടുകൾ പ്രധാന ക്ഷേത്രത്തിന്റെ തെക്കുപടിഞ്ഞാറു ഭാ​ഗത്തുള്ള പരകമണി മണ്ഡപത്തിലേക്ക് മാറ്റും. അൻപതോളം ക്ഷേത്ര ജീവനക്കാരും സ്വമേധയാ സേവനം ചെയ്യുന്ന ഭക്തരിൽ ചിലരും ചേർന്നാണ് കാണിയ്ക്കയായി ലഭിക്കുന്നനാണയങ്ങളും കറൻസികളും വേർതിരിച്ച് പരകമണി മണ്ഡപത്തിലേക്ക് എത്തിക്കുന്നത്.

സ്വർണവും വെള്ളിയുമെല്ലാം സുരക്ഷിതമായ മറ്റൊരു സ്ഥലത്ത് സൂക്ഷിക്കും. വഴിപാടുകളുടെ മൂല്യം ഒരു അപ്രൈസറുടെ സാന്നിധ്യത്തിൽ മാസത്തിലൊരിക്കൽ കണക്കു കൂട്ടും. പിന്നീട് ഇവ കർശന സുരക്ഷാ ക്രമീകരണങ്ങളോടെ തിരുപ്പതിയിലെ ടിടിഡി ട്രഷറിയിലേക്ക് അയയ്ക്കും.

ഔദ്യോഗിക കണക്കുകൾ പ്രകാരം, ദിവസേന തിരുപ്പതി ക്ഷേത്രത്തിൽ രണ്ടര കോടി രൂപ മുതൽ ആറു കോടി രൂപ വരെ വഴിപാടായി ലഭിക്കുന്നുണ്ട്. എന്നാൽ, ഭക്തരുടെ നീണ്ട ക്യൂവും തിരക്കും കാരണം വഴിപാട് ക്ഷേത്രത്തിന് പുറത്തേക്ക് മാറ്റാൻ ബുദ്ധിമുട്ടായി.

ഇപ്പോൾ ചെറിയ ലിഫ്റ്റ് ഉപയോഗിച്ച് ലോറിയിൽ കയറ്റിയാണ് പുതിയ പരകമണി മണ്ഡലത്തിലേക്ക് വഴിപാടുകൾ മാറ്റുന്നത്. നാണയങ്ങൾ എണ്ണി പായ്ക്ക് ചെയ്യുന്നതിനായി പുതിയ പരകമണി കെട്ടിടത്തിൽ രണ്ട് യന്ത്രങ്ങൾ സ്ഥാപിക്കാനും ടിടിഡി അധികൃതർ ആലോചിക്കുന്നുണ്ട്.

ഇതുമായി ബന്ധപ്പെട്ട് 2.8 കോടി രൂപയുടെ ടെൻഡറുകൾ ടിടിഡി സ്വീകരിച്ചു.രേഖകളനുസരിച്ച്, പതിനേഴാം നൂറ്റാണ്ട് മുതലാണ് ഭക്തർ തിരുപ്പതി ക്ഷേത്രത്തിൽ വഴിപാടുകൾ സമർപ്പിക്കുന്ന പതിവ് ആരംഭിച്ചത്. ചെറിയ മൂല്യത്തിൽ തുടങ്ങിയ വഴിപാടുകൾ ഇപ്പോൾ വലിയ തുകകളിലേക്ക് എത്തി. 1965-ന് മുമ്പ്, തിരുമലയിലെ പ്രധാന ക്ഷേത്രത്തിന്റെ ഗോൾഡൻ ഗേറ്റിന് മുന്നിൽ വെച്ചാണ് ജീവനക്കാർ വഴിപാട് എണ്ണിത്തിട്ടപ്പെടുത്തിയിരുന്നത്.