പ്രധാനമന്ത്രി നരേന്ദ്ര മോദിയുടെ അമ്മയുടെ വി​ഗ്രഹ പ്രതിഷ്ഠയുമായി തമിഴ്‌നാട്ടിലെ ക്ഷേത്രം

തമിഴ്‌നാട്ടിലെ തിണ്ടിവനത്തിനടുത്തുള്ള വളരെ ശാന്തമായ ഒരു ചെറുപട്ടണമാണ് മൈലം. കല, ആത്മീയത എന്നിവയെ പ്രോത്സാഹിപ്പിക്കുന്ന ക്ഷേത്രങ്ങൾക്ക് പേരുകേട്ട ഇടമാണിവിടം. ഇവിടുത്തെ പ്രധാന ക്ഷേത്രമാണ് ഓം വിജയ മീനാക്ഷി സുന്ദരേശ്വര ക്ഷേത്രം. ഈ ക്ഷേത്രത്തിൽ എത്തുന്ന ഭക്ത‍‍ർക്ക് രോഗശാന്തി ലഭിക്കുമെന്നാണ് വിശ്വാസം.

ആചാരപരമായ നിരവധി കാര്യങ്ങളിൽ പലപ്പോഴും ശ്രദ്ധ നേടിയിട്ടുള്ള ക്ഷേത്രം കൂടിയാണിത്. എന്നാൽ ഇത്തവണ ക്ഷേത്രം വാ‍ർത്തകളിൽ ഇടം നേടിയത് പ്രശസ്ത സംവിധായകനും നടനുമായ ജി മാരിമുത്തുവിന്റെയും ഇന്ത്യൻ പ്രധാനമന്ത്രിയുടെ പരേതയായ അമ്മയുടെയും വി​ഗ്രഹങ്ങൾ ഇവിടെ പ്രതിഷ്ഠിച്ചതു കൊണ്ടാണ്.

പുതുച്ചേരിയിലെ ബിജെപി നേതാവായ വിക്കിയാണ് മീനാക്ഷി സുന്ദരേശ്വര ക്ഷേത്രത്തിൽ പ്രധാനമന്ത്രി നരേന്ദ്ര മോദിയുടെ അമ്മ ഹീരാബെൻ മോദിയുടെ വി​ഗ്രഹം സ്വന്തം ചെലവിൽ ക്ഷേത്രത്തിൽ പ്രതിഷ്ഠിച്ചത്. രാജ്യത്തെ നയിക്കുന്ന നേതാവിനോടും കുടുംബാംഗങ്ങളോടും ജനങ്ങൾക്കുള്ള ബഹുമാനത്തിന്റെയും ആദരവിന്റെയും സൂചനയാണ് ഈ വി​ഗ്രഹ പ്രതിഷ്ഠയ്ക്ക് പിന്നിലെന്ന് ബന്ധപ്പെട്ട വൃത്തങ്ങൾ പറഞ്ഞു. ജനപ്രിയ സംവിധായകനും നടനുമായ ജി മാരിമുത്തുവിന്റെ വി​ഗ്രഹവും ക്ഷേത്രത്തിൽ പ്രതിഷ്ഠിച്ചു.

പ്രതിഷ്ഠാ ചടങ്ങിന് സൗത്ത് ഇന്ത്യൻ ഫിലിം പ്രൊഡ്യൂസേഴ്‌സ് അസോസിയേഷൻ പ്രസിഡന്റ് ജാഗ്വാർ തങ്കത്തെ ക്ഷണിച്ചിരുന്നു. ചടങ്ങിന്റെ ഭാ​ഗമായി പരേതരായ ആത്മാക്കൾക്ക് ശാന്തി ലഭിക്കുന്നതിനായി പ്രത്യേക പൂജകളും നടത്തി. കൂടാതെ മുന്നൂറോളം പേർക്ക് വിഭവസമൃദ്ധമായ സദ്യയും ഒരുക്കിയിരുന്നു. ചടങ്ങിന്റെ മുഴുവൻ ക്രമീകരണങ്ങൾക്കും ക്ഷേത്ര ട്രസ്റ്റിമാരും അധീനം ആദിശങ്കരർ-വാഷുഗി ഗ്രൂപ്പും ചേ‍ർന്നാണ് നേതൃത്വം നൽകിയത്. ‌

പ്രധാനമന്ത്രി നരേന്ദ്ര മോദിയുടെ അമ്മ 2022 ഡിസംബർ 30ന് അഹമ്മദാബാദിലെ ആശുപത്രിയിൽ വച്ച് 99-ാം വയസ്സിലാണ് അന്തരിച്ചത്. 2023 സെപ്റ്റംബർ 8നാണ് ജി മാരിമുത്തു മരിച്ചത്. ഹൃദയാഘാതത്തെ തുടർന്നായിരുന്നു അദ്ദേഹത്തിന്റെ മരണം.