Maha Shivratri 2023 | കന്യാകുമാരിയിലെ ശിവാലയ ഓട്ടത്തിന് ഭക്തിനിർഭരമായ തുടക്കം

നാഗർകോവിൽ: കന്യാകുമാരി ജില്ലയിലെ ചരിത്രപ്രധാനമായ 12 ശിവക്ഷേത്രങ്ങളിലേക്കുള്ള ശിവാലയ ഓട്ടത്തിന് ഭക്തി നിർഭരമായി തുടക്കം കുറിച്ചു. കാവി വസ്ത്രവും കഴുത്തിൽ രുദ്രാക്ഷമാലയും, കൈയിൽ ഭസ്മ സഞ്ചിയും വീശരറിയുമായി ശിവ ഭഗവാനെ ഭക്തർ കാൽനടയായി 12 ക്ഷേത്രങ്ങളിൽ എത്തി ദർശനം നടത്തുന്നതിനാണ് ശിവാലയ ഓട്ടം എന്ന് പറയുന്നത്.

ശൈവ വൈഷ്ണവ ബന്ധം ഊട്ടിയുറപ്പിക്കുന്ന ശിവാലയ ഓട്ടം കന്യാകുമാരി ജില്ലയിൽ മാത്രമാണ് നടക്കുന്നത്. 110 കിലോമീറ്റർ കുഭമാസത്തിലേ വേനൽ വെയിലിൽ കാൽ നടയായി ഭക്തർ മുഞ്ചിറ ക്ഷേത്രത്തിലെ സന്ധ്യാ ദീപാരാധന തൊഴുത്തിറങ്ങുന്നതാണ് പഴയ ആചാരം എന്നാൽ ഇപ്പോൾ ഇന്നലെ രാവിലെ മുതൽ കാൽ നടയും വാഹനങ്ങളിലുമായി ധാരാളം പേർ എത്തുന്നുണ്ട്.

മുഞ്ചിറയിലെ തിരുമല മഹാദേവ ക്ഷേത്രത്തിൽ നിന്നാണ് ശിവാലയ ഓട്ടം ആരംഭിച്ചത്. മല മുകളിൽ ഇരിക്കുന്ന ശിവ ഭാഗവനെ തൊഴുത ശേഷം 'ഗോവിന്ദാ ഗോപാല ' എന്ന മന്ത്രം ഉച്ചത്തിൽ മുഴക്കി കൊണ്ട് ഭക്തർ പടിയിറങ്ങും.

മുൻകാലങ്ങളിൽ തിരുമല ക്ഷേത്രത്തിലെ സന്ധ്യാ ദീപാരാധന തൊഴുതാണ് ഭക്തർ ശിവാലയഓട്ടം ആരംഭിക്കുന്നത് എന്നാൽ ഇത്തവണ രാവിലെ മുതൽ തന്നെ ശിവാലയ ഓട്ടം ആരംഭിച്ചു. ഇതിനാൽ വൈകുന്നേരം മുതൽ തന്നെ ക്ഷേത്രങ്ങളിൽ വൻ തിരക്കനുഭവപ്പെട്ടു.

താമ്രഭരണി നദി തീരത്താണ് രണ്ടാമത്തെ ക്ഷേത്രമായ തിക്കുറിശ്ശി ക്ഷേത്രം. മൂഞ്ചിറയിൽ നിന്ന് 12 കിലോമീറ്ററാണ് ഇവിടേക്ക്. തൃപ്പരപ്പ് ക്ഷേത്രത്തിലേക്ക് എത്താൻ 14 കിലോമീറ്റർ. നാലാമത്തെ ക്ഷേത്രമായ തിരുനന്ദിക്കരയിൽ എത്താൻ എട്ട് കിലോമീറ്ററും സഞ്ചരിക്കണം.

പൊന്മന, പന്നിപ്പാകം, പത്മനാപുരത്തെ കൽക്കുളം, മേലാങ്കോട്, തിരുവിടയക്കോട്, തിരുവിതാംകോട്, തൃപ്പന്നികോട്, തിരുനട്ടാലം ക്ഷേത്രങ്ങളിൽ ദർശനം നടത്തി നട്ടാലം ക്ഷേത്രത്തിൽ തൊഴുതിറങ്ങിയാൽ ശിവാലയ ഓട്ടം പൂർത്തിയാക്കും.

ശിവരാത്രി ദിവസം 12 വർഷത്തിലൊരിക്കൽ ഓരോ ക്ഷേത്രങ്ങളിൽ നടത്താറുള്ള ഘൃതധാരാ ഇത്തവണ തിരുവിടയ്കോട് ശിവക്ഷേത്രത്തിലാണ്. ശിവാലയ ഓട്ടത്തോടനുബന്ധിച്ച് കന്യാകുമാരി ജില്ലയ്ക്ക് ഇന്ന് ജില്ലാ കളക്ടർ ശ്രീധർ പ്രാദേശിക അവധിയും പ്രഖ്യാപിച്ചിട്ടുണ്ട്.

എല്ലാ ക്ഷേത്രങ്ങളിലും തമിഴ്നാട് ദേവസ്വം ബോർഡിന്റെ നേതൃത്വത്തിൽ ക്ഷേത്രത്തിൽ ദർശനം നടത്തുന്ന ഭക്തജനങ്ങൾക്ക് അന്നദാനവും ദർശന സൗകര്യവും ഏർപ്പെടുത്തിയിട്ടുണ്ട്. ജില്ലാ പൊലീസ് മേധാവി ഹരി കിരൺ പ്രസാദിന്റെ 1500 പോലീസ് ഉദ്യോഗസ്ഥരെ സുരക്ഷക്കായി നിയോഗിച്ചിട്ടുണ്ട്.

ശിവാലയോട്ടം പോകുന്ന സ്ഥലങ്ങളിൽ വീട് വളപ്പിൽ ഭക്തർക്ക് അന്നദാനവും, കുടിവെള്ളവും നൽകുന്നുണ്ട്.