Shubman Gill| അതിവേഗം 2000 റൺസ്; റെക്കോഡ് ബുക്കിൽ പേരുചേർത്ത് ശുഭ്മാൻ ഗില്‍

ധരംശാല: ലോകകപ്പില്‍ ന്യൂസിലന്‍ഡിനെതിരായ മത്സരത്തിനിടെ റെക്കോഡ് ബുക്കില്‍ ഇടംപിടിച്ച് ഇന്ത്യന്‍ യുവ ഓപ്പണര്‍ ശുഭ്മാന്‍ ഗില്‍. ഏകദിനത്തില്‍ ഏറ്റവും വേഗത്തില്‍ 2000 റണ്‍സ് തികയ്ക്കുന്ന താരമെന്ന നേട്ടമാണ് ഗില്ലിന് സ്വന്തമായിരിക്കുന്നത്. ഇതോടൊപ്പം ഈ നേട്ടത്തിലെത്തുന്ന ഏറ്റവും പ്രായം കുറഞ്ഞ താരമെന്ന റെക്കോഡും ഗില്ലിന്റെ പേരിലായി.

ഏകദിനത്തിലെ 38ാം ഇന്നിങ്‌സിലാണ് ഗില്‍ ഈ നാഴികക്കല്ല് പിന്നിട്ടിരിക്കുന്നത്. 40 ഇന്നിങ്‌സുകളില്‍ നിന്ന് ഈ നേട്ടത്തിലെത്തിയ മുന്‍ ദക്ഷിണാഫ്രിക്കന്‍ താരം ഹാഷിം അംലയുടെ പേരിലുണ്ടായിരുന്ന റെക്കോഡാണ് ഗില്‍ തിരുത്തിയത്. അംല 12 വര്‍ഷം കൈയടക്കിവെച്ചിരുന്ന റെക്കോഡാണ് ഗില്‍ തകർത്തത്.

2011 ജനുവരി 21ന് പോര്‍ട്ട് എലിസബത്തിലെ സെന്റ് ജോര്‍ജ് പാര്‍ക്കില്‍ ഇന്ത്യയ്‌ക്കെതിരായ മത്സരത്തിലായിരുന്നു അംല 2000 റണ്‍സ് തികച്ചത്. ഗില്ലാകട്ടെ ധരംശാലയില്‍ ന്യൂസിലന്‍ഡിനെതിരേ വ്യക്തിഗത സ്‌കോര്‍ 14ല്‍ എത്തിയപ്പോഴാണ് ഈ റെക്കോഡ് മറികടന്നത്. മത്സരത്തില്‍ 31 പന്തുകള്‍ നേരിട്ട ഗില്‍ 26 റണ്‍സെടുത്ത് പുറത്തായി.

സഹീര്‍ അബ്ബാസ് (45 ഇന്നിങ്‌സുകള്‍), കെവിന്‍ പീറ്റേഴ്‌സണ്‍ (45), ബാബര്‍ അസം (45), റാസ്സി വാന്‍ഡെര്‍ ദസ്സന്‍ (45) എന്നിവരെയെല്ലാം ഗില്‍ പിന്നിലാക്കി. ഈ വര്‍ഷം ഇതുവരെ 23 ഏകദിനങ്ങളില്‍ നിന്നായി 66.25 ശരാശരിയില്‍ 1325 റണ്‍സ് ഗില്‍ നേടിയിട്ടുണ്ട്.

അഞ്ച് സെഞ്ചുറിയും ആറ് അര്‍ധ സെഞ്ചുറിയും ഒരു ഇരട്ട സെഞ്ചുറിയുമാണ് ഈ വർഷം ഗിൽ അടിച്ചുകൂട്ടിയത്. ശിഖര്‍ ധവാനെ മറികടന്ന് ഏകദിനത്തില്‍ വേഗത്തില്‍ 2000 റണ്‍സ് തികയ്ക്കുന്ന ഇന്ത്യന്‍ താരമാകുകയും ചെയ്തു. 48 ഇന്നിങ്‌സുകളില്‍ നിന്നായിരുന്നു ധവാന്റെ നേട്ടം. 2014 നവംബര്‍ ഒമ്പതിന് ഹൈദരാബാദില്‍ ശ്രീലങ്കയ്‌ക്കെതിരായ മത്സരത്തിലായിരുന്നു ധവാന്റെ നേട്ടം.