'അല്ലു അർജുനോട് എന്നെ താരതമ്യപ്പെടുത്തരുത്'; മത്സരാർത്ഥിയോട് അമിതാഭ് ബച്ചൻ

തെന്നിന്ത്യയിൽ ഒട്ടനവധി ആരാധകരുള്ള പാൻ ഇന്ത്യൻ താരമാണ് അല്ലു അർജുൻ.ഇപ്പോഴിതാ താരത്തെ കുറിച്ച് അമിതാഭ് ബച്ചൻ പറഞ്ഞ വാക്കുകൾ സോഷ്യൽ മീഡിയയിൽ ശ്രദ്ധനേടുകയാണ്. അമിതാഭ് ബച്ചൻ അവതാരകനായിട്ടുള്ള കോന്‍ ബനേഗാ ക്രോർപതി 16 എന്ന പരിപാടിക്കിടെ മത്സരാർത്ഥി അല്ലുവുമായി ബച്ചനെ താരതമ്യപ്പെടുത്തുകയുണ്ടായി. ഇതിനെതിരെയാണ് താരം പ്രതികരിച്ചിരിക്കുന്നത്. കൊൽക്കത്തയിൽ നിന്നുള്ള വീട്ടമ്മയായ രജനി ബർണിവാളിയായിരുന്നു മത്സരാർത്ഥി. ഇവരോട് അല്ലു അർജുനോടുള്ള ഇഷ്ടത്തെക്കുറിച്ച് ബച്ചൻ ചോദിച്ചപ്പോൾ എനിക്ക് നിങ്ങളെ രണ്ടു പേരെയും ഇഷ്ടമാണെന്നും രണ്ടു പേരും അഭിനയിക്കുമ്പോൾ ചില സാമ്യങ്ങൾ ഉണ്ടെന്നും മത്സരാർത്ഥി പറയുന്നു. പല സിനിമകളിലും കോമഡി രംഗങ്ങളിൽ ബച്ചന് സമാനമായി ഷർട്ടിന്റെ കോളറിൽ അല്ലു കടിക്കുന്നതാണ് ഇവർ സാമ്യമായി പറയുന്നത്.