കരയുന്ന മകളെ ചേർത്തു പിടിക്കാനാകാതെ വിതുമ്പി നഴ്സായ അമ്മ: കരളലിയിക്കും ചൈനയിൽ നിന്നുള്ള കാഴ്ച

ചൈനയിലെ ഒരു ആശുപത്രിക്ക് മുന്നിൽ നിന്നുള്ള കരളലിയിക്കുന്ന ഒരു ദൃശ്യമാണ് ഇപ്പോൾ വൈറലായിരിക്കുന്നത്. കൊറോണ രോഗികളെ പരിചരിക്കുന്ന നഴ്സായ ലിയു ഹയ്യാൻ എന്ന യുവതിക്ക് ഭക്ഷണവുമായെത്തിയ മകളാണ് ഇപ്പോൾ ദുരന്തമുഖത്ത് നൊമ്പരമായിരിക്കുന്നത്.

Also Read-പോസ്റ്ററിൽ ഹിന്ദുക്കളെ അപമാനിച്ചു; ഇമ്രാൻഖാന്റെ പാര്‍ട്ടി നേതാവിനെ സസ്പെൻഡ് ചെയ്തു

കൊറോണ രോഗികളെ പരിചരിക്കുന്നവർക്ക് മറ്റാളുകളുമായി നേരിട്ട് സമ്പർക്കത്തിലേര്‍പ്പെടുന്നതിന് വിലക്കുണ്ട്. നഴ്സായ അമ്മക്ക് ഭക്ഷണവുമായെത്തിയ മകൾ നിശ്ചിത അകലത്തിൽ നിൽക്കുന്ന അമ്മയെ കെട്ടിപ്പിടിക്കണമെന്ന് കാട്ടി കൈകൾ വിടർത്തി നിന്നു കരയുകയാണ്. അമ്മയും അകലെ നിന്ന് വായുവിൽ കൈകൾ ഉയർത്തി മകളെ സ്നേഹം അറിയിക്കുന്നു.

വിതുമ്പിക്കരഞ്ഞു കൊണ്ടുള്ള അമ്മയുടെയും മകളുടെയും സ്നേഹ പ്രകടനമാണ് സോഷ്യൽ മീഡിയ ഏറ്റെടുത്തിരിക്കുന്നത്. ' അമ്മയെ തനിക്ക് ഒരുപാട് മിസ് ചെയ്യുന്നു എന്നാണ് മകൾ പറയുന്നത്. അതിന് മറുപടിയായി അമ്മ 'രാക്ഷസന്‍മാരോട് പൊരുതുകയാണ്... അവരെ കീഴടക്കിയ ശേഷം അമ്മ വീട്ടിലേക്ക് മടങ്ങിയെത്താം.. നല്ലകുട്ടിയായി ഇരിക്കു' എന്നാണ് പറയുന്നത്.

ഇതിനു ശേഷം അമ്മയ്ക്കായി കൊണ്ടു വന്ന ഭക്ഷണം അവിടെ വച്ച് കുട്ടി പിന്നോട്ട് നടക്കുന്നു. കുട്ടി മാറിയശേഷം മാത്രം അമ്മ വന്ന് ഭക്ഷണവും എടുത്ത് പോവുകയാണ്.