ഇഎംഐയ്ക്ക് വാങ്ങിയ ഫോൺ വിൽക്കാൻ മാളിലെത്തിയ ഭാര്യയെ തോളിലേറ്റി ഭർത്താവ് പുറത്തിറക്കി

യുവാവ് ഭാര്യക്കായി ഇഎംഐയ്ക്ക് ഒരു പുതിയ ഫോൺ വാങ്ങി നൽകി. ഇതിന്റെ തിരിച്ചടവ് ഇനിയും പൂർത്തിയായിട്ടില്ല. ഫോൺ ഇഷ്ടപ്പെടാതിരുന്ന ഭാര്യ ഭർത്താവറിയാതെ ഇത് വിൽക്കാൻ ശ്രമിച്ചു. ഇതിനായി രഹസ്യമായി മാളിലെത്തി. എന്നാൽ വിവരമറിഞ്ഞ് അവിടെയെത്തിയ ഭർത്താവ് യുവതിയെ ബലമായി തന്റെ തോളിലേറ്റി പുറത്തേക്ക് നടന്നുപോവുകയായിരുന്നു. തോളിൽ നിന്ന് ഇറങ്ങാൻ യുവതി ശ്രമിക്കുന്നുണ്ടെങ്കിലും യുവാവ് അവരെ വിടാതെ കൊണ്ടുപോകുന്നത് വീഡിയോയിൽ കാണാം.

വീഡിയോ സോഷ്യൽ മീഡിയയിൽ വൈറലായതോടെ നിരവധി പേരാണ് പ്രതികരണങ്ങളുമായി രംഗത്തെത്തിയത്. ഭർത്താവിന്റെ പ്രവർത്തി അങ്ങേയറ്റം അപമാനകരമാണെന്നും, ദേഷ്യം ഉണ്ടെങ്കിൽ അത് മറ്റൊരു രീതിയിൽ തീർക്കണമായിരുന്നുവെന്നും ചിലർ അഭിപ്രായപ്പെടുന്നു. 'ഇതൊരു തമാശയല്ല, മറിച്ച് നിയന്ത്രണാതീതമായ സ്വഭാവത്തിന്റെ ലക്ഷണമാണ്' എന്ന് ചിലർ കുറിച്ചു. അതേസമയം, ഭർത്താവ് കഷ്ടപ്പെട്ട് വാങ്ങിയ സമ്മാനം അദ്ദേഹത്തോട് ചോദിക്കാതെ വിൽക്കാൻ ശ്രമിച്ച ഭാര്യയുടെ പ്രവർത്തി നന്ദികേടാണെന്ന് വാദിക്കുന്നവരും കുറവല്ല.