കോവിഡിനെ പ്രതിരോധിക്കാൻ ദിവസവും 5 ലിറ്റർ വെള്ളം കുടിച്ചു; യുവാവ് അത്യാസന്ന നിലയിൽ

കോവിഡ് ലക്ഷണങ്ങൾ കണ്ടതിനെ തുടർന്നാണ് 34 കാരനായ ലൂക്ക് വില്യംസ് ദിവസവും അഞ്ച് ലിറ്റർ വെള്ളം കുടിച്ചത്. ഓരോ മനുഷ്യരുടേയും ആരോഗ്യത്തിന് അനുസരിച്ചായിരിക്കണം വെള്ളം കുടിക്കേണ്ടത്. ദിവസവും രണ്ട് ലിറ്റർ വെള്ളം കുടിക്കാനായിരുന്നു ഡോക്ടർ ലൂക്കിന് നൽകിയ നിർദേശം.

എന്നാൽ, ഡോക്ടറുടെ നിർദേശം ലംഘിച്ച് രണ്ട് ലിറ്റർ വെള്ളം എന്നത് ലൂക്ക് അഞ്ച് ലിറ്ററാക്കി ഉയർത്തി. ആവശ്യത്തിൽ കൂടുതൽ വെള്ളം കുടിച്ചതോടെ ശരീരത്തിലെ സ്വാഭാവിക സോഡിയം പുറംതള്ളപ്പെട്ടതോടെയാണ് യുവാവ് അത്യാസന്ന നിലയിലായത്. കൂടുതൽ വെള്ളം കുടിച്ചതോടെ ശരീരത്തിലെ ലവണം അപകടകരമാം വിധം കുറഞ്ഞു. കുളിമുറിയിൽ ബോധരഹിതനായി വീണ ലൂക്കിനെ ഉടനെ ആശുപത്രിയിൽ എത്തിക്കാനായതിനാൽ ജീവൻ നഷ്ടമായില്ല. ഡെയ് ലി മെയിൽ റിപ്പോർട്ട് ചെയ്യുന്നു.

അമിതമായ ജല ഉപഭോഗം കാരണം ലൂക്കിന്റെ മസ്തിഷ്കം വീർക്കുന്നതായും അദ്ദേഹത്തെ തീവ്രപരിചരണ വിഭാഗത്തിൽ രണ്ട് മൂന്ന് ദിവസം പാർപ്പിച്ചതായും ഡോക്ടർമാർ അറിയിച്ചു. ലൂക്ക് ഇപ്പോൾ അപകടനില തരണം ചെയ്തിട്ടുണ്ട്.