ഫോൺ വിളിക്കിടെ അറിയാതെ രണ്ടു ഡോസ് വാക്സിൻ കുത്തിവെച്ചു; നഴ്സിനെതിരെ പരാതി

കാൺപുർ: രാജ്യാവ്യാപകമായി കോവിഡ് -19 വാക്സിനേഷൻ പുരോഗമിച്ചു വരികയാണ്. ലോകത്തെ തന്നെ ഏറ്റവും വലിയ വാക്സിനേഷൻ പ്രവർത്തനമാണ് ഇന്ത്യയിൽ നടക്കുന്നതെന്ന് പ്രധാനമന്ത്രി നരേന്ദ്ര മോദി തന്നെ വ്യക്തമാക്കിയിരുന്നു. 45 വയസിന് മുകളിലുള്ളവർക്ക് വാക്സിൻ നൽകുന്നത് ഏപ്രിൽ ഒന്നു മുതൽ തുടങ്ങിയിരുന്നു. അതിനിടെ ഒരു നഴ്സിന്‍റെ അശ്രദ്ധ കാരണം ഒരാൾക്ക് രണ്ടു ഡോസ് വാക്സിൻ ഒരുമിച്ചു കുത്തിവെച്ചുവെന്ന വാർത്തയാണ് ഇപ്പോൾ പുറത്തുവരുന്നത്. ഉത്തർപ്രദേശിലെ കാൺപൂരിൽ ആണ് സംഭവം. കാൺപൂരിനടുത്ത് മണ്ടൗലി പ്രൈമറി ഹെൽത്ത് സെന്ററിലെ നഴ്‌സാണ് മൊബൈൽ ഫോണിൽ സംസാരിച്ചുകൊണ്ടു ഒരു സ്ത്രക്ക് കോവിഡ് -19 വാക്‌സിൻ ഇരട്ട ഡോസ് കുത്തിവെച്ചത്.