COVID 19 |  UAE റെസിഡൻസി വിസ ഉള്ളവർക്കും പ്രവേശിക്കാനാവില്ല; വിലക്ക് പ്രാബല്യത്തിൽ

സന്ദർശക-വാണിജ്യ വിസ വിഭാഗക്കാര്‍ക്ക് നേരത്തെ തന്നെ പ്രവേശന വിലക്കേർപ്പെടുത്തിയിട്ടുണ്ട്. ഇതാദ്യമായാണ് റെസിഡൻസി വിസക്കാർക്കും വിലക്ക് വരുന്നത്. അവധിക്കായും വ്യാവസായിക ആവശ്യങ്ങൾക്കുമായി രാജ്യത്ത് നിന്നു മാറി നിൽക്കുന്ന പ്രവാസികളെ ബുദ്ധിമുട്ടിലാക്കുന്നതാണ് പുതിയ തീരുമാനം.നിലവിൽ സ്വന്തം രാജ്യങ്ങളിൽ തന്നെയുള്ള പ്രവാസികൾ അതത് രാജ്യങ്ങളിലെ യുഎഇ നയതന്ത്ര അധികൃതരെ ബന്ധപ്പെട്ട് മടങ്ങിവരവ് സംബന്ധിച്ച് കാര്യങ്ങൾക്കായി പിന്തുണ തേടാമെന്നാണ് യുഎഇ വിദേശ കാര്യ മന്ത്രാലയം അറിയിച്ചിരിക്കുന്നത്.

കോവിഡ് 19 പശ്ചാത്തലത്തിൽ യുഎഇ ഭരണകൂടം നടപ്പിലാക്കി വരുന്ന കര്‍ശന പ്രതിരോധ പ്രവർത്തനങ്ങളുടെ ഭാഗമായാണ് ഈ താത്ക്കാലിക വിലക്കെന്നാണ് ദേശീയ സുരക്ഷാ കൗൺസിൽ പുറത്തു വിട്ട പ്രസ്താവനയിൽ പറയുന്നത്. ഈ ഉത്തരവ് പ്രകാരം ഇനിയൊരയിപ്പുണ്ടാകുന്നത് വരെ മറ്റ് രാജ്യക്കാർക്ക് യുഎഇയില്‍ പ്രവേശനമുണ്ടാകില്ല.

യുഎഇ സ്വദേശികൾ, ഖത്തര്‍ ഒഴികെയുള്ള ഗള്‍ഫ് രാജ്യങ്ങളിൽ നിന്നെത്തുന്നവര്‍,നയതന്ത്ര പ്രവർത്തകർ എന്നിവരെ വിലക്കിൽ നിന്നൊഴിവാക്കിയിട്ടുണ്ട്.